اداری فسادگه قرشی کوره‌شیش و تیکشیریش مستقل کمیته‌سی (MEC) معلوماتی گه کوره، حکومت بلندمرتبه‌لی رسمیلری، زوروان‌لر و ایکّی مجلس اعضاسی اوز یقین قرینداشلرینی تشقی ایشلر وزیرلیگی نینگ دیپلماتیک و کلیدی لوازم‌لرگه ایش‌گه آلگن.
مذکور معلومات‌گه کوره، تشقی ایشلر وزیرلیگی‌گه ایش‌گه کیریش سیناو اوتکزگن 1300 کیشی ایچی‌دن، یالغیز 48 کیشی کامیاب بولگن و باشقه‌لری کیشی لر اورنی‌گه، 40 کیشی حکومت رسمی لری و ملی کینگش اعضاسی یقینلری جایلشتیریلگن.
اداری فسادگه قرشی کوره‌شیش و تیکشیریش مستقل کمیته‌سی (MEC) نینگ اجرایی باشلیغی راشد بهروز نینگ ایتیشیچه، تشقی ایشلر وزیرلیگی باشقه اداره‌لردن کوره حکومت بلند مرتبه‌لی رسمیلری و نفوذلی کیشی‌لر دقتی‌نی جلب ایتگن وزیرلیک‌دیر.
جناب بهروزگه کوره، سابق و حاضرگی حکومت رسمیلری، زوروان‌لر و مجلس اعضالری تشقی ایشلر وزیرلیگی‌گه ایش گه آلیش لایحه‌سیگه اره‌له‌شیب اوز یقین قرینداشلرینی مذکور وزیرلیک‌نی کلیدی لوازم‌لرگه تعینلش‌گه سعی و حرکت ایته‌دیلر.
جناب بهروز نینگ کوپیتیریشیچه، حاضرگی کون‌لرده خلق نماینده‌لری و حکومت بلندمرتبه‌لی رسمی لری نینگ 20 دن آشه راق قرینداشی تشقی ایشلر وزیرلیگی‌ده ایشلب یورگن.
مذکور معلومات‌گه کوره، سابق و حاضرگی پارلمان نماینده‌لری نینگ 12 قرینداشی، سابق وزیرلرنینگ قیز و اوغیل فزندلری شامل تورت کیشی و حکومت‌نینگ سابق و حاضرگی بلندمرتبه‌لی رسمیلری نینگ 7 یقین قرینداشی عملی شکل‌ده تشقی ایشلر وزیرلیگی‌ده ایشلب یورگن.
شونینگ‌دیک، بیر ایلچی، بیر اورین باسر و اوچ سیاسی سکرتر سابق حکومت بلندمرتبه‌لی رسمیلری نینگ قرینداش‌لری تشقی ایشلر وزیرلیگی نینگ کلیدی لوازمی‌گه خذمت قیلیب تورگنی ایتیله‌دی.
اداری فسادگه قرشی کوره‌شیش و تیکشیریش مستقل کمیته‌سی (MEC) نینگ اجرایی باشلیغی، تشقی ایشلر وزیرلیگی‌گه سیناو آرقه‌لی کیره دیگن کیشی‌لر، یوزمه یوز سوزلشوو سیناوی‌ده یوتوققه ایریشب دیپلماسی انستیتوتی‌گه شامل بولگنیدن کیین تشقی ایشلر وزیرلیگی گه خذمت‌گه آلینه‌دیلر دیگن. بیراق جناب بهروزگه کوره، کوپینچه کیشی‌لر بو لایحه‌نی اوتکزمس‌دن مذکور وزیرلیک‌گه ایش گه کیرگن‌لر.
بوندن آلدین هم حکومت اداره لرده، دولت بلندمرتبه‌لی رسمیلری، مجلس نماینده لری اوز یقین قرینداشلرینی ایش گه کیریشی اوچون اره‌لشگنی خصوصی‌ده گزارش‌لر ترقه‌تیلگن ایدی.
جمهور رییس‌غنی نیچه کون آلدین تشقی ایشلر وزیرلیگی‌گه شخصی علاقه آرقه‌لی مذکور وزیرلیک‌ده ایش گه آلینگن کیشی‌لرنی تانیب و ایش‌دن بوشه‌تیشی توغریسی‌ده فرمان بیرگن ایدی.
