مملکت یوکسک اوقوو رسمی‌لری‌نینگ ایتیشیچه، دولتی بیلیم یورتلر اوقیتوچیلریدن بیرقطاری، اوشبو بیلیم یورتلرده رسمی ایشلری چاغیده، خصوصی بیلیم یورتلرده درس بیره‌دی.
مذکور وزیرلیک خصوصی بیلیم یورتلر باشلیغی امیر کامه‌وال‌نینگ سلام‌وطندارگه ایتیشیچه، نیچه مرته مذکور اوقیتوچیلرنی آگاه‌لنتیریب و نامه بیرگن؛ بیراق اولر بونگه قره‌مه‌ی خصوصی بیلیم یورتلرده ایشلری‌گه دوام بیرگن. اونگه کوره، مذکور اوقیتوچیلردن کوپینچه‌سی حقوق، اقتصاد و انجنیرلیک بولیم‌لریدن دییله‌دی.
جناب کامه‌وال‌نینگ ایتیشیچه، یوکسک اوقوو وزیرلیگی، دولتی بیلیم یورتلر اوقیتوچیلری‌نینگ درسی‌نی خصوصی بیلیم یورتلرده قانونی قیلیش‌گه قرار قیلگن؛ بیراق شونده‌ی بولگن صورتده هم، مذکور اوقیتوچیلر دولتی بیلیم یورتلرده درسی بولگن چاغده، خصوصی بیلیم یورتلرده درس بیرمس‌لیک‌لری کیره‌ک.
شونینگ‌دیک، یوکسک اوقوو وزیرلیگی خصوصی بیلیم یورتلر باشلیغی‌نینگ ایتیشیچه، اوشبو ریاست جدی صورتده بیلیم یورتلرنی نظارت قیلیش‌گه باشله‌گن، مذکور اوقیتوچیلر ایشلریدن وازکیچمه‌گن صورتده، درس‌دن محروم بولیشی ممکن.
انه شونده‌ی، کابل بیلیم یورتی اقتصاد و حقوق بولیمی اوقووچیلریدن بیرقطاری‌نینگ ایتیشیچه، اولرنینگ اوقیتوچیلریدن بیرقطاری رسمی ساعت‌لرده درس‌لریگه حاضر بولمه‌یدی. اوشبو اوقووچیلرگه کوره، مذکور اوقیتوچیلر یالغیز سیناو یقین‌لشگنی‌گه صنف‌ده کیلیب و نیچه درس‌نی بیر ساعت‌ده ارایه ایته‌دی.
اوقووچیلر ایشانچی‌گه کوره، دولتی بیلیم یورتلر اوقیتوچیلری‌نینگ خصوصی بیلیم یورتلرده درس بیریش دلیلی، خصوصی بیلیم یورتلر امتیازی کوپلیگی دیر.
بیراق، یوکسک اوقوو وزیرلیگی نشراتی بولیم باشلیغی صفی‌الله جلال‌زی‌نینگ ایتیشیچه، دولتی بیلیم یورتلر اوقیتوچیلری 25 الی 65 مینگ افغانی آیلیک آله‌دی. جناب جلال‌زی‌گه کوره، هیچ بیر اوقیتوچی‌نینگ، ایرته‌لب ساعت 8 دن کیچ قورون ساعت 4 گچه خصوصی بیلیم یورتلرده درس بیریش‌گه حقی یوق دیر. اونگه کوره، یوکسک اوقوو وزیرلیگی، بو اوقیتوچیلر بیلن جدی و قانونی صورتده حرکت قیله‌دی.
باشقه تاماندن، یوکسک اوقوو وزیرلیگی خصوصی بیلیم یورتلر باشلیغی‌نینگ ایتیشیچه، اولرنینگ خصوصی بیلیم یورتلردن قولگه کیریتکن معلومات‌لری‌گه اساس، مذکور بیلیم یورتلرنی بیرقطاری‌ده مسلکی اوقیتوچی یوق دیر و مذکور اوقیتوچیلردن بیرقطاری (14-) صنف‌گچه درس اوقیگن.
مملکت یوکسک اوقوو وزلیگی‌نینگ ینگی قانونی‌گه اساس، بیلیم یورت اوقیتوچیلری کمیده «ماستر» بولیش‌لری کیره‌ک.
یوکسک اوقوو وزیرلیگی رقمی‌گه کوره، حاضر افغانستان‌ده 120 بیلیم یورت و خصوصی یوکسک اوقوو مؤسسه فعالیت قیله‌دی. بو جمله‌دن، 54 بیلیم یورت و یوکسک اوقوو مؤسسه کابل‌ده و باشقه 66 مؤسسه و بیلیم یورت ولایت‌لرده فعالیت قیله‌دی.
