قطرنینگ باشکینتی دوحه‌ده آمریکا و طالبان گروهی‌نینگ نماینده‌لری، آلتی کون افغانستان کیله‌جگی و تینچلیک جریانی خصوصیده، مذاکره قیلیب و سوزلشگن‌لر. مذکور ییغین توغریسیده بولگن تولیق معلومات رسمی شکلده میدیالرگه بیریلمه‌گن؛ لیکن کورینیشیچه، ایکی تامان سوزلشوولردن راضی‌لیک بیلدیرگن.
دوحه ییغینی‌نینگ ایکی کون دوام تاپیشی ممکن ایدی؛ بیراق ایکی طرف‌نی علاقه‌مندلیکی باعث، اوشبو ییغین آلتی کون دوام قیلگن.
بو مدت‌ده میدیالر تامانیدن فرق‌لی معلومات‌لر ترقه‌تیلگن.
طالبان گروهی‌گه یقین منبع‌لرنینگ میدیالرگه ایتیشیچه، چیت‌ایللیک کوچلرنینگ چیقیشی، آتیش‌کیسین، سوزلشوولرنی افغانستان‌لیک‌لر آره‌سیده باله‌نیشی، خلق ارا کوچلری‌نینگ چیقیش زمانی بیللی ایتیلیشی، قماقخانه‌ده بولگن طالبلرنینگ قوییب یوباریلیشی و موقت حکومت قوریلیشی خصوصیده کیلیشیلگن.
بیراق سوزلشوو طرف‌لری بو توغریده احتیاط بیلن صحبت قیله‌دیلر.
افغانستان تینچلیک لایحه‌سی بوییچه امریکانینگ خاص نماینده‌سی زلمی خلیلزاد، دوحه ییغینی یکونله‌نیشی بیلن کابل‌گه کیلگن. اونینگ توییتر صحیفه‌سیده یازیشیچه، سوزلشوولردن قطار یوتوق‌لر قول‌گه کیلگن؛ بیراق هیچ نرسه نهایی ایمس.
خلیلزاد گه کوره، قطار موضوع‌لر هنوز نامعلوم دیر و اولر توغریسیده کوپراغ صحبت قیلیش کیره‌ک.
خلیلزادنینگ کوپه‌یتیریشیچه، آتیش‌کیسین و سوزلشوولرنینگ افغانستان‌لیک‌لر آره‌سیده باشله‌نیشی خصوصیده کیلیشیلمه‌گن صورتده، باشقه توغری‌لرده کیلیشووگه نیاز ایمس.
طالبلر هم بو توغریده احتیاط بیلن صحبت قیله‌دی.
اوشبو گروه بیر خبرنامه آرقه‌لی، دوحه ییغینی‌نی نهایی بیلمه‌گن و اوشبو ییغین‌ده چیت‌ایللیک حربی لرنینگ افغانستاندن چیقیشی و باشقه اونملی موضوع‌لر خصوصیده، یوتوق‌لیک‌لر حاصل بولگنی‌نی بیلدیرگن.
خبرنامه گه کوره، موضوع‌لرنینگ پیچیده بولگنی باعث، مناسب حل یول تاپگن گه‌قدر اوشبو ییغین‌نینگ دوام تاپیشی ممکن.
مذکور خبرنامه گه کوره، آتیش‌کیسین و طالبلرنینگ افغانستان حکومتی بیلن یوزمه‌یوز سوزلشووی توغریسیده کیلیشوو صورت تاپگنی ناتوغری دیر.
بیراق دوحه ییغینی‌نینگ جزئیاتی‌نی میدیالر و یشاوچیلر بیلن شریک ایتلمه‌گنی سوراق‌لی دیر؟
طالبلر سابق رسمی‌سی و سیاسی ایش بیلرمانلردن بیری وحید مژده نینگ سلام‌وطندارگه ایتیشیچه، افغانستان دولتی‌نینگ رضایتی بولمه‌گنی باعث، تولیق معلومات‌لر میدیالر بیلن شریک ایتیلمه‌گن.
طالبلر اوشبو سابق رسمی‌سیگه کوره، میدیالر تامانیدن ترقه‌تیلگن بوتون معلومات‌لر توغری دیر.
جناب مژده نینگ کوپه‌یتیریشیچه، خلیلزاد آتیش‌کیسین توغریسیده صحبت قیلیش اوچون کابل‌گه سفر قیلگن.
اونینگ ایتیشیچه، تینچلیک سوزلشوولری کیله‌جک بیر هفته‌گه‌قدر قطرده قیته‌دن باشلنه‌دی.
عین‌حالده، تینچلیک عالی کینگشی‌نینگ ایتیشیچه، سوزلشوو طرف‌لری‌نینگ جواب قیته‌رمه‌گنی باعث، میدیالر تامانیدن فرق‌لی معلومات‌لر ترقه‌تیله‌دی.
تینچلیک عالی کینگشی‌نی اورین باسری اسدالله زایری نینگ ایتیشیچه، سوزلشوولرنینگ افغانستان‌لیک‌لر آره‌سیده باشله‌نیشی و آتیش‌کیسین موضوع‌سی، دوحه ییغینیده مطرح ایتیلگن.
عین‌حالده، امریکا تشقی ایشلر وزیری مایک پمپئو نینگ توییتر صحیفه‌سیگه یازیشیچه، امریکا قوشمه ایالاتی، افغانستانده تینچلیک کیلتیریش، تروریزم‌گه قرشی کوره‌ش و افغانستاندن حربی‌لرینی چیقاریشی خصوصیده جدی دیر.
شونینگ‌دیک افغانستان سابق جمهور رییسی حامدکرزی، بیر خبرنامه آرقه‌لی تینچلیک سوزلشوولردن حمایت قیلگن.
