د بهرنیو چارو وزارت ویلي چې د افغانستان، امریکا او روسیې په ګډه درېاړخیزه غونډه کې چې پرون جوړه شوه، د بینالافغاني خبرو اترو د پیل لپاره د طالب بندیان د خوشې کولو هرکلی وشو او له طالبانو وغوښتل شول چې دغو اقداماتو ته درناوی وکړي.
بهرنیو چارو وزارت د یوې خبرپاڼې په خپرولو سره ویلي چې د دغه وزارت سرپرست وزیر محمدحنیف اتمر، د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد او د افغانستان لپاره د روسیې ځانګړي استازي ضمیر کابلوف د ویډیويي کنفرانس له لارې پر افغان سولې غږېدلي دي.
د خبرپاڼې له مخې، د غونډې ښکېلو لوریو له طالبانو غوښتي چې د بینالافغاني خبرو اترو د پیل او باور جوړونې لپاره تاوتریخوالی کم کړي. په خبرپاڼه کې لیکل شوي چې ګډونوالو د بینالافغاني خبرو د پیل لپاره د افغان دولت او طالبانو د چمتووالي هرکلی کړی او زیاته کړې ده چې د راتلونکو پړاوونو لپاره باید د مرکچي پلاوي د ټیمونو ترمنځ یوه ګډه غونډه جوړه شي.
خبرپاڼه زیاتوي چې د غونډې ګډونوالو ویلي چې د سولې هوکړهلیک له مخې باید دوامداره اوربند له پیله د بینالافغاني خبرو اترو اصلي برخه شي.
دا درېاړخیزه غونډه داسې مهال جوړېږي چې د ولسمشر ویاند صدیق صدیقي په یوه ټویټ کې لیکلي چې ټاکل شوې د افغان دولت او طالبانو ترمنځ لومړنۍ غونډه په دوحه کې جوړه شي.
د افغان سولې لپاره د امریکا د بهرنیو چارو وزارت ځانګړي استازي زلمي خلیلزاد هم ویلي و چې د سیمې او نړۍ هېوادونه سولې ته د رسېدو لپاره د افغانستان ملاتړ کوي.
