بغلان ولایتی دندغوری ولسواللیگی نینگ قطار قوم یاش اولوغلریگه کوره، حکومت بیلن امضالنگن امنیتی کیلیشوو اوشبو تومنده خوفسیزلیک تامین لهنیشگه سبب بولگن. اولرنینگ سوزلریگه قرهگنده مذکور شرطنامه امضالنگندن سونگ اوشبو تومنده هیچ قندهی توقنشوو یوز بیرمهگن؛ اوز اوی جایلریدن آواره بولگن یوزلب خانهدان قیتهدن اوز بنالریگه قیتگنلر.
عین حالده، دندغوری ولسواللیگینینگ ایریم قوم یاش اولوغلری پایتخت کابلگه کیلیب، مذکور ولسواللیک قوراللی طالبلرگه تسلیم بیریلگنی اوچون اعتراض بیلدیرگن ایدیلر.
بوندن ایکی هفته آلدین افغانستان جمهور رییسی فرمانی اساسیده ولایتی کینگش ادارهسی و قوم یاش اولوغلری اورتهسیده کیلیشوو امضالهنیشی اوچون هیأت دندغوریگه جونه تیلگن ایدی. جمله 21 قیشلاق نینگ تورلی قوملریدن عبارت اون کیشی قوم یاش اولوغلری ولایت کینگشی و حکومت نماینده لری اورتهسیده مذکور شرطنامه امضالنگندی. ایسله تیلگن شرطنامهده دندغوری ولسواللیگیگه هیچ بیر قوراللی گروه کیریش حقیگه ایگه ایمس.
حکومت نینگ ولایتگه سفر قیلگن نمایندهسی مملکت قوم وقبیلهلر وزیری محمدگلاب منگل مذکور 9 مادهلیک شرطنامهنی امضالهگن. جناب منگلگه کوره، بغلان ولایتی دندغوری منطقهسیده 3600نفر قوراللی شخص موجود اولرنینگ برچهسی منفعتی اوروش و توقنشووگه باغلیق.
دندغوری ولسواللیگینینگ قوم یاش اولوغلریدن حاجی مستوخان نینگ ایتیشیچه، اوتگن بیر آیدن بیری اوشبو تومنده حتی بیر اوق نینگ هم آوازی ایشیتیلمهگن. قوم یاش اولوغلریدن باشقه بیری محمد امانگه کوره، مذکور ولسوالیک هرگز قوراللی طالبلرگه بیریلمهگن، بلکه قوم یاش اولوغلرینینگ کنترولیده.
اوشبو کیلیشووگه اساسن قوم یاش اولوغلری پلخمری – مزار شریف عمومی یولیدن دندغورینینگ چشمهشیر منطقهسیگچه اوروش تامانلری اورتهسیده هیچ قندهی توقنشوو یوز بیرمسلیگی توغریسیده وعده بیرگنلر و اژدههار دوانی دن دهنه غوریگچه هم هیچ کیم قوراللی توقنشوو قیلیش حقی گه ایگه ایمس.
شونینگدیک شرطنامهده کیلیشیچه، اوز ییشش جایلریدن آواره بولگنلر قیتهدن اویلریگه قیتیشی کیرهک. دولت ادارهلری اینیقسه کشفی ادارهلر محل آقسقاللری اجازهسیز هیچ کیمسهنی حبسگه آلیش حقی یوق. منطقه ده هرج و مرج گه سبب بولهدیگن کیشیلر آقسقاللر تامانیدن اوشلهنیب دولت ادارهلریگه تاپشیریلهدی.
محل رسمیلرینینگ ایتیشلریچه، اوتگن 9 آیده روی بیرگن قوراللی توقنشوولرده 52 کیشی تینچ اهالی قربان بولگن و 116 نفر ایسه یره لنگن. شونینگدیک 22 مسجد، 226 یشش اوی، 4 مکتب ویران ایتیلگن و 3000 خانهدان اوز اوی جایلریدن آواره بولگنلر.
