افغانستان بوییچه رحمت‌الله نبیل رهبرلیگی‌ده بولگن خوفسیزلیک و عدالت سیلاو تیمی نینگ ایتیشیچه، جمهورلیک ریاست سیلاوی نینگ دستلبکی نتیجه‌سی اعلان قیلینگنی دموکراسی و مردم‌سالارلیک‌که قرشی کودتا دیر.
مذکور تیم نینگ اعلامیه‌سیده کیلیشیچه، سیلاو ایرکین کمیسیونی حقوقی چارچوبه و طرفسیزلیک خصوصیده قانیقرلی جواب بیرمه‌گن و نتیجه‌نی طرفلی شکلده اعلان قیلگن.
اوشبو اعلامیه‌ده اورغولنیشیچه، سیلاو ایرکین کمیسیونی نتیجه‌نی بونده‌ی اعلان قیلیب «دموکراسی تابوتی گه سونگی میخ نی اورگن.»
رحمت‌الله نبیل نینگ ایتیشیچه، محمداشرف غنی رهبرلیگی‌ده بولگن دولت قورووچی تیمی کمیسیون نینگ ایشلریده دخالت قیلگن و سیلاو جریانی‌نی قانونی یولیدن چیقارگن.
مذکور تیم سیلاو شکایت‌لرینی تینگلش کمیسیونیدن شکایت‌لرنی طرفسیز شکلده تیکشیریشی‌نی سوره‌گن.
6- میزان سیلاوی نینگ نتیجه‌سی آیلرچه توخته‌تیلیب بوگون «یکشنبه» اعلان قیلیندی.
دستلبکی نتیجه اساسیده، محمداشرف غنی 923868 آواز «50.64%» قولگه کیریتیب بیرینچی و عبدالله عبدالله 720990 آواز «39.52%» قولگه کیریتیب ایکینچی بولگن.
شونینگدیک، داکتر عبدالله عبدالله دستلبکی نتیجه‌نی قبول قیلمه‌ی و بوگون توشدن آلدین ترقه‌تگن اعلامیه‌ده ایتیشیچه، سیلاو ایرکین کمیسیونی آرقه‌لی ساخته‌کارلیک اساسیده، اعلان قیلینگن نتیجه‌نی قبول قیلمه‌یدی. بیراق، دولت قورووچی تیمی اعلان قیلینگن دستلبکی نتیجه‌نی خوش قرشی‌لب و باشقه‌لردن نتیجه گه تَن بیریش‌لرینی طلب قیلدی.
