د ملي دفاع وزارت سرپرست وزیر اسدالله خالد او د کورنیو چارو وزارت سرپرست وزیر مسعود اندرابي نن ملت ته د حکومت د ځواب ویلو په پروګرام کې د یادو وزارتونو د تېر کال لاستهراوړنې او د روان کال پلانونه وړاندې کړل.
د ملي دفاع وزارت سرپرست اسدالله خالد وویل چې تېر کال یې د تشکیلاتي تورم او د موازي برخو له امله په کابل کې د دغه وزارت له قرارګاه او قطعاتو نه څه باندې ۳ زره او ۷۰۰ کسان تنقیص کړي دي.
د خالد په خبره، په دفاع وزارت کې د ملکي کولو بهیر روان دی او تر اوسه ۲ زره او ۹۴۷ ملکي بستونه تعدیل او ملکي وګړي په یادو بستونو کې ګومارل شوي دي.
خالد زیاتوي، د هوايي ځواک پیاوړتیا او دوه برابره کول د دفاع وزارت له لومړيتوبونو نه دی او همداراز د پوځ ځوانول هم د دغه وزارت د پروګرامونو په سر کې ځای لري.
د نوموړي په خبره، د مالي سرچینو برېښنايي مدیریت د دغه وزارت یو بل لومړیتوب دی چې په بشپړېدو سره به یې د پرسونل د سلیقهيي ترفېعاتو او تبدیلیو مخه نیول کېږي او د معاشونو پر وخت نه رسېدو او د پرسونل د حاضرۍ د څار ستونزه به هم ورسره هواره شي.
اسدالله خالد د طالبانو له لوري د جګړې فشار د سولې په بهیر کې د امتیاز او اقتصادي پروژو ترلاسه کولو لپاره وباله، خو ډاډ یې ورکړ چې ډېر ژر به د له لاسه وتلو سیمو بېرته نیولو لپاره عملیات پیل شي.
په همدې حال کې د کورنیو چارو سرپرست وزیر مسعود اندرابي وویل، له اداري فساد سره د مبارزې لپاره د دغه وزارت د کورني امنیت ریاست تازه خپلې چارې پیل کړي چې د جوړېدو موخه یې له اداري فساد سره مبارزه، د ملي پولیسو په لیکو کې د فاسدو کسانو په نښه کول او د هغوی افشا کول دي.
اړوند مطالب:
اسدالله خالد د امریکا د دفاع سرپرست وزیر سره ولیدل
ولسي جرګه پر اسدالله خالد پوري شوي تورونه بېبنسټه بولي
د نوموړي په وینا، یاد وزارت په تېر کال کې له ۷ زرو نه د ډېرو وسلو جوازونه لغوه کړي او د زرهي موټرو د تګراتګ د مخنیوي لپاره یې هم تدابیر نیولي دي.
دا په داسې حال کې ده چې د امنیتي ځواکونو او طالبانو ترمنځ جګړه د هېواد په ډېرو ولایتونو کې دوام لري او طالبانو هم خپل بریدونه د دولت تر کنټرول لاندې سیمو کې ډېر کړي دي.
