د فاریاب ولایتي شورا غړي وايي، دفاعي ځواکونو دې ولایت کې میمنې ـ هرات پر لویه لاره د المار او قیصار ولسوالۍ په اوږدو کې خپلې قرارګاوې او پوستې خوشې کړي او د ولسوالیو په مرکزونو کې ځای پرځای شوي دي.
د فاریاب ولایتي شورا مرستیال صبغتالله سېلاب سلاموطندار سره د خبرو پرمهال دا د امریکا د ولسمشر ډونالډ ټرمپ د هغې جګړهییزې تګلارې برخه بولي چې د ده په باور، له مخې یې امنیتي ځواکونه هغه سیمې چې لږ نفوس ولري، پرېږدي او په ښارونو کې ځای پرځای کېږي.
په همدې حال کې د قیصار ولسوالۍ ولسوال حاجي رحمتالله هم مني چې دفاعي او امنیتي ځواکونو په یاده سیمه کې خپلې قرارګاوې او پوستې خوشې کړي دي.
خو د لوی درستیز مرستیال عبدالحمید حمید پهدې اړه سلاموطندار ته وویل چې یادې سیمې یې د حکومت په لارښوونه د دفاعي ځواکونو د مرګژوبلې مخنیوي او د ولسوالیو د مرکزونو ساتلو په موخه خوشې کړي دي.
د نوموړي په وینا، په هغو سیمو کې یې چې مخکې قرارګاوې او پوستې لرلې، بېځایه وې.
د میمنې ـ هرات لویې لارې په اوږدو کې د فاریاب غورماچ، قیصار او المار ولسوالۍ دي چې په ۲۰ ورځو کې ۱۵۰ امنیتي او دفاعي ځواکونه وژل شوي، ټپیان او یا هم وسلهوالو طالبانو نیولي دي.
