ټاکل شوې ده، د افغانستان ۱۹ کلنه کرکټ ملي لوبډله راتلونکې میاشت د ۱۹ کلنو په ۵۰ اوریزو (اسیا جام) کرکټ ټورنمېنټ کې ګډون وکړي، چې د ۳ افغان لوبغاړیو په ګډون به په دغه لوبډله کې پاکستانۍ لوبډله هم ګډون ولري.
د افغانستان کرکټ بورډ له خوا د ډېسمبر پر ۱۵ مه نېټه پیلېدونکیو سیالیو مهالوېش او لوبډلو وېش اعلان شو، چې افغان ۱۹ کلنه کرکټ ملي لوبډله به په کې په (ب) ګروپ کی لوبې وکړي.
د ورکړل شویو معلوماتو له مخې، په دې سیالیو کې د افغانستان ۱۹ کلنې کرکټ ملي لوبډلې تر څنګ د پاکستان، بنګله دېش، هندوستان، مالیزیا، سریلانکا، نیپال او سنګاپور لوبډلې هم برخه لري.
د اعلان شوي مهالوېش له مخی به افغان ۱۹ کلنه کرکټ ملي لوبډله خپله لومړۍ سیالي د ډېسمبر میاشتې پر ۱۵ مه نېټه له بنګله دېشۍ ۱۹ کلنې کرکټ ملي لوبډلې سره وکړي.
دغه راز د دې سیالیو په دوام به افغان ۱۹ کلنه کرکټ ملي لوبډله د ډېسمبر پر ۱۶ م له پاکستان او د ډېسمبر پر ۱۸ م له سنګاپور لوبډلې سره سیالي وکړي.
افغان ۱۹ کلنه کرکټ ملي لوبډلې له نږدې یوې میاشتې راهیسي دغو سیالیو ته د ښه چمتووالي په موخه د هندوستان په (ممبۍ) کې په تمریناتو بوخته ده.
د افغانستان ۱۹ کلنه کرکټ ملي لوبډله به په هندوستان کې له تمریناتو او له ۶ تمریني سیالیو وروسته د ډېسمبر پر ۸ مه نېټه سریلانکا ته روانه شي.
د ورکړل شویو معلوماتو له مخې، په پاکستانۍ اعلان شوې ۱۹ کلنې کرکټ ملي لوبډلې کې بیا ۸ پښتانه لوبغاړي اخیستل شوي، چې د کونړ، ننګرهار او نورستان ۳ افغان لوبغاړي هم په کې شامل دي، چې د نومونو اخیستل یې ښایي د کرکټ راتلونکې ته زیان ورسوي.
ویل کېږي، په پاکستانۍ ۱۹ کلنې کرکټ ملي لوبډلې کې غوره شويو ۳ افغان لوبغاړیو د افغانستان په کورني کرکټ کی د لوبېدو هڅې کړي؛ خو چانس نه دی ورکړل شوی؛ ځکه یې نو د پاکستان له پاره د لوبېدو پرېکړه کړیده.
په دې اړه د افغانستان کرکټ بورډ مرستیال حاجي عزیزالله فضلي سلام وطندار ته وویل، دوی به د دغو ۳ لوبغاړيو د ریکارډ څېړنه وکړي، چې په ریښتیا هم افغانستان ته د ازموینې له پاره راغلي وو او که نه او که استعداد ته یې پاملرنه نه وه شوی. د ده په خبره په دې اړه به له مسوولو چارواکیو څخه په دی اړه ځواب وغواړي.
فضلي خوښي وښوده، چې د افغانستان د کرکټ استعداد اوس د نورو هېوادونو په ګټه هم کارول کېږي.
