دایکندی ولایتی‌نینگ ولایت کینگشی بیر اعضاسی و بیر قنچه مدنی فعال‌لر، ولایت والیسی معصومه مرادی‌نینگ ایری، تورموش اورتاغی صلاحیت‌لرینی سوءاستعمال قیلیب، ولایت ایشلریگه اره‌لشه‌دی دیگن‌لر.
او، دایکندی ولایت والیسی‌نینگ ایری خلیل پیلوت‌نی ولایت‌ده قول‌مه – قول بوله دیگن بعضی حجت‌لرده توغریدن توغری قولی بارلیگینی ادعا ایتگن.
ولایت کینگشی‌نینگ اعضاسی سمیه محمدی‌نینگ سلاموطندارگه ایتیشیچه، معصومه مرادی دایکندی والیسی ایتیب تعین‌لنگن‌دن بیری، ولایت‌نینگ اداری ایش‌لریده توغریدن – توغری تورموش اورتاغی تاثیری آستی‌گه کیتگن.
خانم محمدی، کیشی‌لر دولت اداره‌لریگه ایش‌گه آلینیش‌ده خلیل پیلوت اره‌له‌شیشی‌نی تیل‌گه آلگن‌لر. مذکور ولایت دولت اداره‌لریگه مسلکی شخص‌لر ایش‌گه آلینیشی اوچون ولایت والیسی نینگ ایری ییریک توسیق بولیشی مدنی فعال‌لر تیلی‌دن ایتیلگن.
مدنی فعال سخی سعادت‌گه کوره، جناب پیلوت محلی حکومت‌ده‌گی تنقیدچی‌لرینی دایم تهدید ایته‌دی.
مدنی فعال همده کونده‌لیک یازووچی رضا واحدی، مرکزی حکومت‌دن دولت اداره‌لریده رسمی ایشی بولمه‌گن شخص‌لرگه حکومت ایشلریگه اره‌له‌شیش اوچون رخصت بیریلمس لیگینی سوره‌گن.
اونینگ سوزلریگه کوره، والی‌نینگ ایر ولایت کاتب‌لیگی‌ده اولتیریب فقط " بویروق" بیره‌دی.
بو ادعالرنی انکار ایتگن ولایت‌نینگ والیسی معصومه تورموش اورتاغی رسمی ایشلریگه هیچ زمان اره‌لشمس لیگینی بیلدیرگن. معصومه مرادی، بیر قطار کیشی‌لرنینگ ایستک‌لریگه ایجابی جواب بیریلمه‌گن لیگی باعث، بونده‌ی پروپاگندلرگه قول اورگن‌لیک‌لرینی معلوم قیلگن.
شونینگ‌دیک ولایت والیسی تورموش اورتاغی‌نینگ سلاموطندارگه بیرگن صحبت‌ده، برچه عیب‌لاولرنی انکار ایتیب، نیچه وقت‌دن بیری کابل‌ده توریشی و خاتی‌نی‌نینگ فعالیت‌لریدن هیچ خبری یوق لیگینی اظهار قیلگن.
