اوزبیکستان جمهور رییس اسلام کریماوف 13 – میده تاشکینتده اوزبیک تیلی و ادبیاتی بیلیم یورتی تشکیل ایتیش توغریسیده فرماننی امضالهگن. فرمانگه کوره، بیلیم یورتنی تشکیل ایتیش اوزبیک تیلی و ادبیاتینی، اونینگ تاریخی ایلدیزلرینی و گوبللشوو شرایطلریدهگی رواجلنیش استقباللرینی چوقور تدقیق ایتیش، اوزبیک تیلی و ادبیاتینی تعلیم – تربیه تیزیمینینگ برچه باسقیچلریده اوقیتیش، شونینگدیک، کادرلر تیارلش صفتینی اوستیریش احتیاجلری بیلن باغلیق دیر.
تنیقلی نواییشناس عالِم عزیز قَیوموف نینگ بی بی سیگه ایتیشیچه، بوندهی فرماننینگ قبول قیلینیشی کتّه ثوابلی ایش بولگن. ایندیگی وظیفه متخصصلر و متصدیلر اوزبیک تیلی و ادبیاتینینگ رونقی، دولت تیلینینگ آبروسی اوچون محنت قیلیشلری لازم بولهدی. نواییشناس عالِمگه کوره، بو عمل اوزبیک تیلینینگ خلق ارا موقعینی آشیریشگه خدمت قیلهدی.
ینگی تعلیم درگاهی ملی یونیورسیتینینگ اوزبیک فیلولوژیسی فاکولتهسی، تاشکینت دولت پیداگوژی بیلیم یورتی اوزبیک تیلی و ادبیاتی فاکولتهسی و اوزبیکستان فنلر اکادمیسی علیشیر نوایی نامیدهگی تیل و ادبیات انستیتوتی نیگیزیده تشکیل ایتیلیشی ایتیلگن.
بیلیم یورتده اوزبیک فیلولوژیسی، اوزبیک تیلی و ادبیاتینی اوقیتیش، اوزبیک – انگلیس ترجمهسی فاکولتهلری طلبهلرنی قبول قیلهدی. شونینگدیک، یونیورسیتی ترکیبیده اوزبیک تیلی و ادبیاتی علمی – تدقیقات انستیتوتی فعالیت آلیب بارهدی.
فنلر اکادمیسینینگ علیشیر نوایی نامیدهگی ادبیات موزیمی اساسیده اوزبیک تیلی و ادبیاتی موزیمی تشکیل ایتیلیشی خبر قیلینهدی. فرمانده کیلتیریلیشیچه، بیلیم یورت فیلولوگلر، علمی – پیداگوژیک کادرلر، یوقاری ملَکهلی ترجمانلر ییتیشتیریب بیرهدی، علمی – تدقیقات فعالیتینی یورغیزیب، ساحه متخصصلرینی قَیته تیارلهیدی، ملَکهسینی آشیرهدی.
ینگی بیلیم یورتده اوقوو جریانی 2016 سپتامبرده باشلنیشی کوتیلهدی. بیلیم یورت بناسی قرشیسیده اوزبیک ادبی تیلی اساسچیسی علیشیر نوایی هیکلینی اورنهتیش رېجهلشتیریلماقده. اجتماعي ترماقلرده اوزبیک تیلیگه اختصاصلشگن ینگی بیلیم یورت آچیلیشی خبری کوپچیلیک تامانیدن قووانچ بیلن قرشی آلینگن.
جملهدن، فیسبوکده فعال خوشنود بیک خدایبیردی شوندهی یازهدی:"گپیرهویردیک، گپیرهویردیک، گپیرهویردیک. نهایت اوزبیک تیلینینگ بوگونگی احوالینی یخشیلش اوچون جمهور رییس فرمانی قبول قیلیندی.
ایندی بویاغیگه کوتهمیز، قنی. نیمه اوزگریشلر بولرکن. و امید قیلهمیزکه، مذکور بیلیم یورت تیلیمیز رونقی اوچون حقیقتده فایدهسی تیگهدیگن، کاغذده ایمس، عملده انیق اصلاحاتلرنی قیله آلهدیگن درگاه بولهدی. بیلیم یورت فعالیتیگه آمدلر تیلهیمیز!"
اوزبیکستانده 1989 ییل 21 آکتوبرده «اوزبیکستان جمهوریتینینگ دولت تیلی توغریسیده» گی قانونی قبول قیلینگن. بیراق هنوز مملکتدهگی کوپ ادارهلرده اوزبیک تیلیدن کوره روس تیلینینگ موقعی بلندلیگی ایتیب کیلینهدی.
بیبیسی مشتريسی فرهاد عبدالرحمنوفنینگ کویینیب یازیشیچه، اوزبیک تیلیگه دولت مقامی بیریلگنیدن کیین قریب 27 ییل اوتدی، لیکن هنوزگچه آنه تیلیمیز تام معناده اوز موقعیگه ایگه بولمهدی. بیرینچیدن، قانون طلبیگه کوره، دولت ادارهلریده ایشلب اوزبیک تیلینی بیلمهیدیگن باشقه ملت وکیللریگه دولت تیلینی اوزلشتیریشلری اوچون بیریلگن مدت اوتیب کیتگنیگه قرهمهسدن، همان دولت ادارهلریده تیلنی بیلمهی دیگنلر بی ملال ایشلهماقدهلر، حتا که ملتی اوزبیک بولگنی حالده اوز آنه تیلیده سوزلشه آلمهیدیگن رهبر و متخصصلر هم هیچ قندهی چیکلاولرسیز دولت اورگانلریده فعالیت کورست ماقدهلر.
ایکّینچیدن، تلویزیون، رادیو و باشقه عامهوی اخبارات واسطهلریده شیوه ده گپلشیش عادتگه ایلنیب بارماقده. اوزبیک ضیالیلریگه کوره، اوزبیک تیلی و ادبیاتی فاکولتهسی نینگ تشکیل ایتیلیشی اوزبیک تیلینینگ مملکتدهگی اورنی، رواجیگه، ادبیاتنینگ رونقیگه قندهی تأثیر قیلیشی وقت مسألهسی دیر.
منبع: بیبیسی اوزبیک خذمتی
