په دایکندي ولایت کې د یوې محلي راډیو مسوولان ادعا کوي چې د دغه ولایت د ولایتي شورا غړي سبحان نایبي ورته ګواښ کړی چې راډیو به یې بنده کړي.
د «افتاب» په نوم دغه راډیو د دایکندي په مرکز نیلي ښار کې فعالیت کوي.
د دغې راډیو د امتیاز خاوند میرزا حسني سلاموطندار ته ویلي، د ولایتي شورا غړي سبحان نایبي ځکه ورته د راډیو د نشراتو بندولو ګواښ کړی چې په وینا یې، د محلي مسوولانو ناکاریو ته انعکاس ورکوي.
د نوموړي په وینا، نایبي د افتاب راډیو مسوولانو ته ګواښ کړی، که د افشاکوونکیو او انتقادي راپورونو خپرول ونه دروي، په زوره به یې راډیو بنده کړي.
خو د ولایتي شورا غړي سبحان نایبي سلاموطندار ته ویلي چې په یاده راډیو کې ونډه لري. د نوموړي په وینا، افتاب راډیو په دې وروستیو کې د رسنیو د اصولو او اخلاقو خلاف نشرات کوي.
د دایکندي یوشمېر خبریالان وايي، د کورونا ویروس له خپرېدو سره په دغه ولایت کې اطلاعاتو ته لاسرسی سخت شوی او دوی د راپور جوړولو پر مهال له ګڼو ستونزو سره مخ کېږي.
یوه خبریال عزتالله توانا سلاموطندار ته ویلي چې په دغه ولایت کې اطلاعاتو ته د لاسرسي حق ورځ تر بلې کمېږي او دولتي ادارې ځوابویلو ته نه حاضرېږي.
د دایکندي خبریالان د رسنیو له ملاتړو بنسټونو غواړي چې یاده موضوع وڅېړي.
