افغانستان ملی بیرلیک حکومتی‌نینگ اجرائیه اداره‌سی باشلیغی داکترعبدالله عبدالله بیر رسمی هیئت باشچیلیگیده اوچ کون اوچون قوشنی ایران‌گه جونب کیتدی. اوشبو سفرافغانستان ملی بیرلیک حکومتی رهبرلری نینگ ایران‌گه قیلگن ایکینچی سفری حسابلنه‌دی. بوندن بیر ییل آلدین افغانستان جمهور رییسی محمداشرف غنی تهران‌گه باریب ایران بلند مرتبه‌لی رسمیلری بیلن ملاقات اوتکزگن ایدی.
داکتر عبدالله عبدالله‌نی اوزی‌نینگ ایران سفری دوامیده ایران بلند مرتبه‌لی رسمیلری جمله‌دن ایران رهبری علی خامنه‌یی شونینگ‌دیک ایران جمهور رییسی حسن روحانی بیلن اوچره‌شیشی کوتیله‌دی.
افغانستان ملی بیرلیک حکومتی‌نینگ اجرائیه اداره‌سی رییسی داکترعبدالله عبدالله تهران‌ده‌گی اوچره‌شوولریده، ایرن تامانی بیلن مخدر ماده‌لر همده ترورچیلیککه قرشی کوره‌ش، ایکی تامانلمه اقتصادی همده سودا ساتیق علاقه‌لری میزانی‌نی آشیریش، مدنی همکارلیک‌لرنی یولگه قوییش کبی حیاتی موضوع‌لر اوستیده بحثلشه‌دی.
ایران افغانستان‌نینگ مهم قوشنی‌لریدن حسابلنه‌دی. حاضرگی کونده کمیده ایکی میلیون افغانستان‌لیک مهاجرلر ایرانده یشه‌یدیلر. اولرنینگ تورلی معمالرینی ایران همکارلیگی‌ده برطرف ایتیش بیرینچی‌دن افغانستان دولتی‌نینگ وظیفه‌لریدن سنله‌دی.
عین حالده ایران بیلن افغانستان ارا تجاری علاقه‌لر اوزاق دورلردن بیری موجود. افغانستان ایران نینگ تجاری توارلری اوچون مهم بازار حسابلنه‌دی. ایران و افغانستان ایریم ساحه‌لرده بیراولری‌گه محتاج. سونگی آیلرده افغانستان حدودیده "اسلامی دولت" یا ایسکی داعش‌گه وفادار قوراللی گروه‌لر فعالیتی آشگنی ایران دولتی‌نی تاباره چوچیتیب قویگن.
ایران دولتی 1391 ییلی افغانستان بیلن اقتصادی همده امنیتی موافقت‌نامه امضاله‌گن ایدی.
ایران دولتی امیریکه نینگ افغانستانده قالیشی‌گه اوز قرشی‌لیگی‌نی هر دایم تاکیدلب کیلگن. رسمی کابل ایسه افغانستان آرقه‌لی قوشنی دولت‌لرگه هیچ قنده‌ی خوف خطر روپه‌ره ایمس‌لیگی ایته‌دی.
ایران نینگ غرب بیلن قره‌مه قرشی‌لیگی عین حالده افغانستان نینگ غرب دولت‌لری بیلن دوست‌لیگی و اولرنینگ حمایتی‌گه محتاج‌لیگی رسمی تهران و کابل مناسبت‌لری‌گه سلبی تاثر اوتکزمی کیلماقده.
بو نرسه افغانستان و ایران دیپلماسی‌سی نینگ یخشی ایشله یاتگنیدن دلالت بیره‌دی. افغانستان ملی بیرلیک حکومتی اجراییه اداره‌سی باشلیغی داکترعبدالله عبدالله نینگ ایرانده قیلگن سفری هم انه‌شو دیپلماسی نینگ موفق بیر مثالی سنله‌دی. ایران و افغانستان دولت‌لری دنیا سطحی‌ده‌گی سیاسی مناسبت‌لرده توتگن اورین‌لری‌گه قره‌می بیر بیرلری بیلن یخشی قوشنی چی‌لیک علاقه‌لرینی نمایش ایتماقده‌لر.
بو نرسه ایکله تامان‌نی هم امنیتی همده اقتصادی ساحه‌ده بیرلریگه جدی احتیاج‌لری بارلیگیدن کیلیب چیقه‌دی. ایران و افغانستان‌نی کیله‌جکده ایریم ساحه‌لرده اینیقسه اقتصاد و تجارت ساحه سیده‌گی همکارلیک‌لری میزانی آشیشی کوتیله‌دی.
بونگه افغانستان‌نینگ قوشنی پاکستان‌نینگ ترانزیت یولی قاله‌ویرسه کراچی بندریگه بولگن احتیاجی‌نی کمه‌یتیریش مساله‌سی بیرینچی دلیل حسابلنه‌دی. افغان سوداگرلری سونگی ییل‌لرده اوزلری‌نینگ تجاری تورلرینی افغانستان‌گه ییتکزیش عکسینچه دنیا نینگ باشقه بازارلریگه آلیب باریش اوچون کراچی بندریگه باغلنیب قالگنلر.
پاکستان تامانی تورلی بهانه‌لر بیلن افغان سوداگرلری‌گه باسیم‌لر اوتکزیب کیلماقده‌لر. سونگی ییل‌لرده افغانستان، ایران و هندوستان دولت‌لری ایران‌نینگ چابهار قیرغاغیده ینگی بیر تجاری بندر برپا ایتیشی اوستیده کیلیشیب آلگنلر.
مذکور بندرفایده‌لنیش‌گه تاپشیریلیشی بیلن افغانستان سوداگرلری نینگ کراچی بندریگه بولگن احتیاج‌لری کته مقدارده کمه‌یه‌دی. اوشبو بندرنی قوریش اوچون هندوستان دولتی کته مبلغ صرفله ماقده. افغانستان‌نینگ داکترعبدالله عبدالله رهبرلیگی‌ده ایران‌گه سفر قیلگن بلند مرتبه‌لی هیئتی‌نی ایران جنوبیده جایلشگن چابهار بندری‌نی یقیندن کوزه‌تیشی هم ایتیله‌دی. مذکور بندر فایدلنیش‌گه تاپشیریلیشی افغانستان‌نی قوشنی پاکستان‌گه بولگن احتیاجی‌نی برطرف ایتیب گینه قالمه‌ی بلکه افغانستان بیلن ایران علاقه‌لرینی مستحکملشگه هم کته خذمت قیله‌دی.
در حقیقت مذکور بندر افغانستان سوداگرلری اوچون باشقه بیر قطار قولی‌لیک‌لرگه هم ایگه. چابهار بندری آرقه‌لی افغانستان‌گه آلیب کیلینه دیگن تجاری توارلر کراچی بندریگه نسبتاً آز راق وقت ایچیده افغانستان‌گه آلیب کیلینه‌دی.
ایکینچی‌دن اوشبو بندر آرقه‌لی تشیله‌دیگن توارلر خوف‌سیزلیگی یخشی راق تامینلنه‌دی. اوچینچی‌دن افغانستان‌لیک سوداگرلر اوچون چابهار بندری باج‌خانه خرجت‌لری جهتیدن فایده‌لی راق بولیشی کوتیله‌دی.
داکترعبدالله عبدالله نینگ ایران سفری، نه فقط اقتصادی مساله‌لر بلکه ایکی قوشنی مملکت ایران و افغانستان ارا فرهنگی علاقه‌لر میدانی‌نی کینگه‌یتیریش اوچون مهم ایکنی تاکیدلنه‌دی. ایرانده حیات کیچیره‌دیگن افغان مهاجرلر فرزندلرینی ایران مکتب‌لری همده عالی اوقوو یورتلری‌ده تحصیل آلیش‌لری اوچون شرایط یره‌تیلیشی شونینگ‌دیک ایران دولتی‌نی افغانستان‌لیک اوقووچی‌لرگه لسانس، ماسترلیک همده دوکتورلیک سویه‌سیده ایران‌نینگ بیلیم درگاه‌لریده امکان یره‌تیشی ضرورتی سیزیله‌دی.
افغانستان بلند مرتبه‌لی هیئتی‌نی اوشبو مساله‌لر اوستیده ایران تامانی بیلن جدی بیر شکلده مذاکره آلیب باریشی درکار. حاضرگی کونده ایرانده تعلیم و تحصیل آلگن اونلب متخصص‌لر ایریم ساحه‌لرده افغانستانده فعالیت آلیب بارماقده‌لر.
ایران عالی اوقوو یورتلریدن بیری‌نینگ وکالت‌خانه‌لری بیرنیچه ییلدن بیری افغانستانده فعالیت آلیب باره‌دی. افغانستان ملی بیرلیک حکومتی اجراییه اداره‌سی باشلیغی‌نینگ ایران سفری ایکی دین داش وتیلداش قوشنی دولت‌لر مناسبتلرینی تاباره مستحکملشگه خذمت قیله‌دی.
