داعشگه قرشی کورهشیش خلق ارا بیرلشیکده افغانستان عضویتی توغریسیده ایش بیلرمانلردن بیرقطارینینگ ایتیشیچه، اوشبو بیرلشیککه قتنهشیش مملکت منفتیگه دیر و حکومت بو فرصتدن داعش گروهیگه قرشی فایدهلنیشی کیرهک.
امیریکه قوشمه ایالتلری تشقی ایشلر وزیری جان کرینینگ ایتالیاده ایتیشیچه، داعشگه قرشی بیرلشیکده افغانستان عضویتی قبول بولگن.
سیاسی ایش بیلرمان رحمتالله بیژنپورنینگ سلاموطندارگه ایتیشیچه، افغانستان تروریستی گروهلر تامانیدن کوپلب زیان کورگن و بوندهی خلق ارا بیرلشیکلرگه اشتراک ایتیشی لازم. اونگه کوره، داعشگه قرشی خلق ارا بیرلشیک اعضالری، تروریستلرگه قرشی کورهشیش خصوصیده، افغانستان امنیتی کوچلرینی جهازلهشی کیرهک.
شونینگدیک، سیاسی ایش بیلرمانلردن باشقه بیری ایوب شهریارنینگ ایتیشیچه، داعش گروهی بیر ییلدن بویان، افغانستان شرقی ولایتلری و باشقه بیرقطار منطقهلریده فعالیت قیلهدی و اوشبو بیرلشیک عضویتی، افغانستانده مذکور گروه فعالیتیگه قرشی یخشی زمینه یرهتهدی.
جناب شهریارنینگ ایتیشیچه، افغانستان بو فرصتدن فایدهلنیب، داعش گروهی توغریسیدهگی معلوماتنی قولگه کیریتهآلهدی.
بیراق، حربی ایش بیلرمان کابلخان تدبیرنینگ ایتیشیچه، داعش گروهیگه قرشی خلق ارا بیرلشیک عضویتی افغانستان اوچون زیانلر بیلن بیرگه بولیشی ممکن. اونینگ ایشانچیگه کوره، بو عضویت پیاملریدن بیری، افغانستانده مذکور گروه فعالیتی و هجوملری شدتلنیشی دیر.
جناب تدبیرنینگ ایتیشیچه، دنیا جماعهچیلیگی، داعش گروهی جنگریلری تعلیم کوریب و باشقه مملکتلرگه یوباریلهدیگن مرکزلرنی هدف قرار بیریشی کیرهک.
تدبیرگه کوره، چیت ایللیک کوچلر، افغانستان امنیتی کوچلرینی ترورچیلرگه قرشی کورهشیش اوچون، جهازلهشی لازم.
افغانستان شوندهی بیرحالده داعشگه قرشی خلق ارا بیرلشیک عضویتینی آلهدی کیم؛ جمهور رییس غنی نیچه مرته، افغانستان داعش و باشقه تروریستی گروهلر گورستانی بولیشینی ایتگن.
شونینگدیک، افغانستان مدافعه وزیرلیگی، سونگی کونلرده ننگرهار ولایتیده اسلامی دولت گروهینینگ قرارگاهی هدف آستیگه آلینگنینی ایتگن.
