افغانستان بوییچه بیرلشگن ملتلر تشکیلاتی دفتری (یوناما) نینگ ینگی گزارشیده ایتیشیچه، میلادی 2017- ییل افغانستانده 10 مینگدن آرتیق تینچ اهالی هلاک ایتیلیب و یرهلنگن.
افغانستان بوییچه بیرلشگن ملتلر تشکیلاتینینگ اورین باسرلیک هیأتی و خلق ارا انسان حقلری ادارهسینینگ ییللیک گزارشی بوگون نشر ایتیلدی و بو گزارشده توپلم شکلده (3438 تینچ اهالی هلاک و باشقه 7015 تینچ اهالی یرهلنگنی) قید ایتیلگن. بو رقم میلادی 2016- ییلگه قرهگنده تینچ اهالی قربانلیگی 9% کمهیگنینی کورستهدی، بیراق بو گزارش خودکش و پارتلش هجوملر نتیجهده تینچ اهالی قربانلیگی کوپهیگنینی کورستهدی.
یوناما گزارشی اساسیده، اوشبو قربانلیکنی 40% خودکش و پارتلش هجوملر نتیجهسیده و 33% ییر اوروشلری نتیجهسیده بولگن. سِرلی قتللر، هوایی عملیاتلر و اوروشدن قالگن پارتلاوچی مادهلر قالگن قربانلیک رقمینی کورستهدی.
افغانستان اوچون بیرلشگن ملتلر تشکیلاتینینگ خاص نمایندهسی تدامیچی یاماموتونینگ ایتیشیچه: «اوشبو گزارشنینگ تأثیرلی رقمی اوروش تأثیری توغریسیده ایشانچلی معلومات تیارلهیدی، بیراق قربانلیک رقمی یالغیزلیکده عادی اهالی اینیقسه عیاللر و بالهلر اوستیگه تحمیل بولهدیگن انسانی مصیبتلرنی صورت گه چیقاره آلمهیدی.»
شونینگدیک، یوناما میلادی 2017- ییلده افغانستان امنیتی کوچلری و چیت ایللیک کوچلرنینگ هوایی هجوملری کوپهیگنیدن خبر بیرهدی. اوشبو تشکیلات افغانستان دولتیگه طرفدار کوچلرنینگ هجومی نتیجهسیده (295 تینچ اهالی هلاک و باشقه 336 تینچ اهالی یرهلنگنینی) رویخط گه آلگن. اوشبو رقم اساسیده، بوتون قربانلیک جملهسیدن 6% هوایی هجوم تشکیل بیرهدی.
عین حالده، یوناما دفتری دولت گه طرفدار چیت ایللیک کوچلرنینگ حرکتلرینی آلقیشلب ایتیشیچه، بو ایشلر 2017- ییلده تینچ اهالی قربانلیگی 23% کمهییشیگه سبب بولگن. بیرلشگن ملتلر تشکیلاتینینگ گزارشیگه کوره، هلاک ایتیلگنلرنینگ 359 تهسینی عیال و 861 تهسینی باله و شونینگدیک، یرهلنگنلردن 865 تهسینی عیال و ایکی مینگدن آرتیغینی باله تشکیل قیلهدی.
شونینگدیک، اوشبو ییغینده سوزگه چیققن ایچکی ایشلر وزیرلیگی سوزلاوچیسی نجیب دانشنینگ ایتیشیچه، اولر عملیاتلرده تینچ اهالی قربانلیگی کمهییشی توغریسیده توانلری باریچه سعی و حرکت قیلهدیلر.
عین حالده، مدافعه وزیرلیگی سوزلاوچیسی دولت وزیرینینگ ایتیشیچه، دولتی کوچلر عاملی بولگن تینچ اهالینینگ قربانلیک رقمی یوناما تامانیدن ترقهتیلگن رقمدن کوره آز دیر.
یوناما گزارشیده قید ایتیلگن تینچ اهالی قربانلیگینی کوپینچهسی کابل، هلمند، ننگرهار، قندهار و فاریاب ولایتلریدن رویخطگه آلینگن.
