راپورونه وايي، چې په سوريه کې د داعش ډلې ځينې جنګيالي د جنګ په مېدان کې خپلې ږيرې تراشلي او په ښځينه لباسونو او حجابونو کې ترکيې له لارې په ډله ییزه توګه اروپايي هېوادونو ته تښتېدلي دي.
د ډېلي مېل ورځپاڼې د راپور له مخې، دغه جنګيالي هغه مهال تېښتې ته ملاګانې وتړلې، چې روسیه اعلام وکړ، چې نظامي ځواکونه به يې په سوريه کې د داعش جنګيالي سخت وځپي او د دوی پر وړاندې د بشار اسد پلوي هم وکړي.
د سنډي ټایمز خبريال له خوا د سوريې حلب ښار ته نژدې دغه انځور اخیستل شوی او هغه ويلي، چې دغه جنګيالي ټول په ښځينه لباس کې د روسيې له ويرې ږيرې د جنګ په مېدان کې پرې ايښي او ډله ډله د روسيې د نظامي بريد له ويرې د ترکيې له لارې اروپايي هېوادونو ته د تګ په نيت تښتېدلې دي.
دا په داسې حال کې ده، چې په دې وروستيو بريدونو کې سوريې په غربي سيمه حما کې شاوخوا ۴۰ تنه د داعش ډلې جنګيالي په هوايي بريدونو کې ووژل شول.
د ويلو ده، چې له دې وړاندې روسيې د داعش ډلې ته ګواښ وکړ، چې دوی به د داعش ډله په مستقيم ډول تر خپلو پوځي بريدونو لاندې راوړي.
د روسيې ولسمشر ولاديمير پوتين ويلي و، چې دی د داعش ډلې مشر ابوبکر البغدادي مړ نه بلکې ژوندی غواړي، ځکه پلان لري، چې وپوهيږي دغه ډله د چا له لوري تمويليږي؟ او غواړي څه وکړي؟.
