د کابل شنبې خونړي برید د قربانیانو له ډلې یو هم محمد عیسی دی. هغه د خپل یوازېني ۳ میاشتېني زوی مخ ونه لید. د محمد عیسی خپلوان وايي، عیسی د کورنۍ یوازېنی ګټیالی و.
خپلوان یې وايي، عیسی په ۵ کلنۍ کې یتم او په روزنتون کې لوی شوی و.
دی له ښوونځي تر فارغېدو وروسته، د لوړو زدهکړو لهپاره هند ته ولاړ، خو د اقتصادي ستونزو لهامله یې زدهکړې نیمګړې پرېښودې او کابل ته راغی چې خپل ژوند سمبال کړي.
ماما یې عبدالشکور کیسه کوي، عیسی د خپل ماشومتوب دوره د یتمۍ په سیوري کې تېره کړه او په سختو اقتصادي شرایطو کې یې واده وکړ؛ بلاخره ماشوم یې هم د پلار په برخلیک اخته شو.
نوموړی هغه مهال د شنبې ورځې په خونړي برید کې قرباني شو، چې کورنیو چارو وزارت ته د کارموندۍ پهپاره ورغلی و.
د محمد عیسی یو ملګری چې د غمرازي لهپاره د هغوی کورنۍ ته ورغلی و، وایي محمد عیسی ډېر د غربت ژوند درلوده او په دې وروستیو کې یې هڅه کوله کار پیداکړي.
په کابل کې د شنبې ورځې قربانیانو ځینې خپلوان، لاهم د خپلو عزیزانو په مړو پسې ګرځي او تراوسه د هغوی په اړه هېڅ معلومات نه لري.
