تخار، زابل، هلمند، بدخشان، فاریاب، بغلان، دایکندی، جوزجان، غور و فراه ولایتلریده خوفسیزلیک مسؤوللری نینگ ایتیشلریچه، اوتگن اوچ کونده مذکور ولایتلرده طالبان نینگ گروهی هجوملری و آتیشمهلر نتیجهسیده خوفسیزلیک کوچلریدن 60 تهسی هلاک و باشقه 48 تهسی یرهلنگن.
بو آرهدن تخار، زابل، هلمند، فاریاب، جوزجان و فراه ولایتلری خوفسیزلیک کوچلری و طالبان آرهسیده جدی آتیشمهلرگه گواه بولگن و خوفسیزلیک کوچلری کوپلب قربانلیک بیرگن.
سلاموطندارگه ییتیشگن معلومات گه کوره، خوفسیزلیک کوچلری نینگ قربانلریدن کوپینچهسی تخار، زابل، هلمند و بدخشان ولایتلریده بولگن.
تخار 13 هلاک و 6 یرهلی، هلمند 10 هلاک و 12 یرهلی، بدخشان، 9 هلاک و 7 یرهلی و زابل 9 هلاک بیلن خوفسیزلیک کوچلری کوپلب قربانلیک بیرگن ولایتلر دیر.
زابل حاکمی سوزلاوچیسی گلاسلام سیال نینگ ایتیشیچه، اوشبو ولایت نینگ ارغنداب تومنیده خوفسیزلیک کوچلری و طالبان آرهسیده یوز بیرگن آتیشمه نتیجهسیده حربی عسکرلردن 6 تهسی هلاک ایتیلگن.
غور، هرات، فاریاب، بادغیس، جوزجان، دایکندی و هلمند ولایتلریده خوفسیزلیک کوچلری مسؤوللری نینگ ایتیشلریچه، آتیشمهلرده طالبان گروهی هم کوپلب قربانلیک بیرگن. طالبان گروهی نینگ جنگریلریدن 49 تهسی هلاک و باشقه 43 تهسی یرهلنگن. اولرگه کوره، طالبان گروهی نینگ هلاک ایتیلگن جنگریلری گه مذکور گروه نینگ ییریک قومندانلری هم شامل بولگن.
جوزجان ولایتی نینگ پولیس قومندانی عبدالواحد وجدان نینگ ایتیشیچه، اوتگن کیچه مذکور ولایت نینگ بیرقطار تومنلریده طالبان گروهی نینگ نیچه هجومی آرقه گه اوریلگن.
اونگه کوره، ینگیلیکده قرقین تومنیده یوز بیرگن آتیشمه ده طالبان گروهی نینگ 5 جنگریسی هلاک ایتیلگن.
اوشبو واقعهلر توغریسیده مدافعه و ایچکی ایشلر وزیرلیکلری نینگ فکرلرینی اورگهنیش اوچون علاقه قوردیک، بیراق تکراری سعی و حرکتلر نتیجهسیده مؤفق بولمهدیک.
