د خوست ولایت نادرشاهکوټ ولسوالۍ ځېنې اوسېدونکي وایي چې د دې ولسوالۍ په زېړي کلي کې نن سهار شاوخوا څلور بجې د امریکایانو تر قوماندې لاندې د «کمپاین» په نوم د ځايي ځواکونو په عملیاتو کې د یوې کورنۍ څلور غړي وژل شويدي.
د دې کورنۍ په غړیو کې دوه نارینه، یوه ښځینه او یوه ماشومه وژل شوېده.
لهدې پېښې وروسته د سیمې سلګونو اوسېدونکیو تر نن مازدیګره د پراخ لاریون په ترڅ کې د خوست ـ کابل لویه لاره تړلې وه.
لاریونوالو چې د کوتکونو او تیږو ګوزارونه یې کول؛ پر سړک د موټرو ټایرونو ته اور واچولو او د پولیسو د تالاشي یوه پوسته یې هم له نړولو وروسته وسوځوله.
دوو لاریونوالو ډاکټر عبدالحکیم او معلم یعقوب وویل، تر هغې به د خوست – کابل تر منځ لویه لار تړلې وي چې د پېښې عاملانو ته سزا نهوي ورکړلشوي.
ښاغلي عبدالحکیم زیاته کړه، دې ځواکونو په عملیاتو کې په یوه ښځه اول لاسونه وتړل، بیا یې په چاکوګانو ووهله او د نورې کورنۍ د وژلو ترڅنګ یې د هغوی کور ته اور واچولو. د ده په خبره، دغو ځواکونو لهدې مخکې هم ورته پېښې کړي او دا ځل یې لا ۴ تنه له ځان سره ژوندي هم وړي دي.
د دغه ستر لاریون په ترڅ کې د پولیسو او لاریونوالو تر منځ اخوډب کې یو لاریونوال او یو پولیس هم ټپيان شويدي.
د خوست ځایناستی امنیه قوماندان عبدالحنان ځدراڼ سلام وطندار سره په اړیکه کې وویل چې د پېښې څېړنې په موخه ولایتي ادارې پلاوی لېږلی او له څېړنې وروسته به نیول شوي څلور کسان بېرته خوشي شي.
ده د ۴ وژل شویو ملکیانو په اړه څه ونه ویل.
په خوست کې د کمپاین په نوم ځايي ځواکونه وختناوخت پهخپلو ځانګړیو عملیاتو کې ملکي کسانو ته مرګو ژوبله اړوي.
څه موده مخکې هم د خوست علیشېرو او تريزویو ولسوالۍ کې د کمپاین ځواکونو د یوې کورنۍ ۷ کسان وژلي وو.
