په قطر کې د طالبانو د سياسي دفتر وياند اعلان کړی چې د دوی سياسي مرستيال ملا عبدالغني برادر او د طالبانو د مرکهچي پلاوي رييس عبدالحکیم حقاني افغان سولې لپاره د امريکا د بهرنيو چارو وزارت له ځانګړي استازي زلمي خلیلزاد سره ليدلي دي.
دوحه کې د طالبانو د سياسي دفتر وياند محمدنعیم وردک نن سه شنبه په يوه ټوېټ کې ليکلي چې دا ليدنه تېره ورځ شوې ده.
نوموړي زياته کړې چې په دې ليدنه کې د قطر د لومړي وزیر مرستيال محمد بن عبدالرحمان لثاني او همداراز د قطر د بهرنيو چارو وزير هم حضور درلود.
د وردک په وينا، په دې ليدنه کې د ټولو زندانيانو پر خوشې کېدو او همداراز د بینالافغاني مذاکراتو د پيل په اړه بحث شوی دی.
دا په داسې حال کې ده چې طالبان وايي، د دوی ټول بنديان نه دي خوشې شوي خو د ملي امنيت شورا وايي چې د طالبانو ټول بنديان يې خوشې کړي دي.
