پاکستان بوییچه آمریکا ایلچیخانهسی تامانیدن نشر ایتیلگن خبرنامهده یازیلیشیچه، افغانستان تینچلیک لایحهسی بوییچه آمریکا تشقی ایشلر وزیرلیگینی خاص نمایندهسی زلمی خلیلزاد، اسلامآبادگه قیلگن ایکی کونلیک سفریده پاکستان رسمیلری بیلن اوچرهشیب افغانستان تینچلیک جریانی توغریسیده صحبت قیلگن.
بوگون «چهارشنبه، 8- عقرب» نشر ایتیلگن اوشبو خبرنامهده کیلیشیچه، جناب خلیلزاد، اوشبو اوچرهشووده پاکستان باش وزیری عمران خان، پاکستان حربی کوچلری نینگ باش قومندانی جنرال جاوید قمر باجوه و مذکور مملکت نینگ باشقه بیرقطاری رسمیلری بیلن افغانستان تینچلیگینینگ حاضرگی جریانی و زوروانلیکلر کمهییشی نینگ اهمیتی توغریسیده صحبت اوتکزگن.
بوندن آلدین، پاکستان باش وزیری نینگ دفتری نی اعلان قیلیشیچه، زلمی خلیلزاد دوشنبه و سهشنبه کونلری اسلامآبادگه کیلیب و عمران خان بیلن اوچرهشگن.
پاکستان باش وزیری نینگ دفتری تامانیدن نشر ایتیلگن اعلامیه اساسیده، زلمی خلیلزاد بیلن اوچرهشگن عمران خان افغانستان تینچلیک جریانیدن حمایت بیلدیرگن.
افغانستانده تینچلیک تأمینلنیشی خصوصیده آمریکا و طالبان گروهی نینگ نمایندهلرینی سوزلشوولریدن 9 دور اوتگنیدن سونگ، سنبله آیی نینگ اورتهلریده کابل شهریده طالبان تامانیدن اویوشتیریلگن بیر خودکش هجوم نتیجهسیده بیر آمریکاییلیک حربی شامل 12 کیشی هلاک ایتیلگنی باعث، اوشبو سوزلشوو دوامی آمریکا جمهور رئیسی دونالد ترامپ تامانیدن بیکار قیلیندی.
زلمی خلیلزاد، اسلامآبادگه سفر قیلیشیدن آلدین، جاری هفته باشلهنیشیده کابل کیلگن ایدی.
اوتگن کون «سهشنبه، 7- عقرب» کابلده خبری بیر ییغین اوتکزگن ملی خوفسیزلیک کینگشی مصلحتچیسی حمدالله محب نینگ ایتیشیچه، خلیلزادنینگ سفری تینچلیک اوچون بولمهگن. اونینگ کوپهیتیریشیچه، خلیلزاد آمریکا-افغانستان بیلیم یورتی نینگ استادلری طالبان نینگ قولیدن قوییب یوباریلیشی خصوصیده، حکومت یاردم بیریشی اوچون کابل کیلگن ایکن.
شو توغریده…
طالبان بیلن تینچلیک سوزلشوولری قیتهدن باشلنهدی؛ والاستریت گزارش بیردی
