د طالبانو له لوري د تاوتریخوالي زیاتوالي ته په کتو، د سولې لپاره د امریکا د بهرنیو چارو وزارت ځانګړي استازي په یوه غونډه کې ویلي چې امریکا په افغانستان کې د تاوتریخوالي له ډېروالي نه ناخوښ دی.
نوموړي پرون په یوه غونډه کې چې د امریکا د سولې انسټېټیوټ له لوري جوړه شوې وه ویلي چې په افغانستان کې د تاوتریخوالي لوړه کچه د منلو نه ده. په دې ویډیويي غونډه کې د افغانستان، ازبکستان او قزاقستان سفیرانو هم ګډون کړی و.
د هغه په وینا، که څه هم په افغانستان کې تاوتریخوالی زیات شوی، خو د تېر کال په پرتله سږ کال د امنیتي ځواکونو او ملکیانو مرګژوبله کمه شوې ده.
دا په داسې حال کې ده چې د ملي امنیت شورا په وروستۍ میاشت کې د تاوتریخوالي زیاتوالي او ملکیانو ته د مرګژوبلې اوښتو خبر ورکړی دی. د ملي امنیت شورا دفتر پرون وویل چې په منځنۍ کچه هره ورځ په هېواد کې ۱۶ ملکیان وژل کېږي.
زلمي خلیلزاد په یاده غونډه کې هیلهمندي ښودلې چې د بینالافغاني خبرواترو له پیل سره به تاوتریخوالی هم کم شي.
په واشنګټن کې د افغانستان سفیرې رویا رحماني په یاده غونډه کې د سولې له پروسې نه د منځنۍ اسیا د ملاتړ غوښتنه وکړه.
په واشنګټن کې د ازبکستان سفیر جولان وکاوبوف ویلي چې د سولې اړوند هڅې باید د خلکو هغه حقونه چې د افغانستان په اساسي قانون او نړیوالو قوانینو کې تضمین شوي، له لاسه ورکړل شي.
په واشنګټن کې د قزاقستان سفیر بیا د بینالافغاني خبرواترو د کوربهتوب په اړه د دغه هېواد د چمتووالی خبر ورکړی دی.
