افغانستان جمهورلیک ریاستی بیر اعلامیه ترقه‌تیب ایتیشیچه، اوتگن کون کیچ قورون افغانستان تینچلیک لایحه‌سی بوییچه آمریکانینگ خاص نماینده‌سی زلمی خلیلزاد، جمهور رئیس محمداشرف غنی و حکومت اعضالری بیلن اوچره‌شیب و دوحه ییغینی توغریسیده بولگن معلومات‌نی اولر بیلن شریک قیلگن.
اوشبو اعلامیه اساسیده، بو اوچرهشووده خلیلزادنینگ ایتیشیچه، دوحه ییغینیده افغانستان‌نینگ کیله‌جک تیزیمی‌نی تشکیلاتی و وقتینچه‌لیک حکومت ایجاد ایتیلیشی خصوصیده، هیچ‌قنده‌ی بحث قیلینمه‌گن و میدیالر تامانیدن ترقه‌تیلگن خبرلر ناتوغری و شایعه دیر.
اعلامیه‌ده خلیلزاد دن نقل قیلینیشیچه، آمریکا نماینده‌لری طالبان گروهی بین یالغیز آتیش‌کیسین اوستیگه صحبت قیلگن؛ بیراق بو توغریده حاضرگچه ایجابی بیر نتیجه قولگه کیلمه‌گن.
خلیلزاد، افغانستاندن چیت‌ایللیک کوچلر چیقیشی خصوصیده، طالب‌لر بیلن کیلیشیلگنینی رد قیلیب ایتیشیچه، بو توغریده آلینه‌دیگن هر بیر قرار اویغونلیک و افغانستان دولتی بیلن باتفصیل صحبت اوتکزیلگنیدن سونگ آلینه‌دی.
اونینگ اورغولشیچه، آمریکا نماینده‌لری‌نینگ مسؤولیتی افغانستان دولتی و طالبان گروهی‌نینگ نماینده‌لری آره‌سیده سوزلشووگه زمینه یره‌تیش دیر و او بو مقصدگه ایریشیش اوچون ینه بیر بار طالبان گروهی‌نینگ نماینده‌لری بیلن اوچره‌شه‌دی.
جمهورلیک ریاستی تامانیدن ترقه‌تیلگن اعلامیه‌ده زلمی خلیلزادنینگ ایتیشیچه، افغانستانده دایمی تینچلیک تأمین‌لنیشی خصوصیده بولگن بیرینچی ییچیم یول افغانستان‌لیک‌لرنینگ آره‌سیده مذاکره اوتکزیلیشی دیر.
