افغانستان تینچلیگی بوییچه آمریکا خاص نمایندهسی زلمی خلیلزاد نینگ ایتیشیچه، تینچلیک سوزلشوولری افغانستانلیکلرنی رهبرلیگی آستیده تیزلیککه باشلنهدی و بو «تاریخی و اونملی» بیر اَدیم دیر.
زلمی خلیلزاد بوگون (چهارشنبه ۲۹- اسد) بیر توییت آرقهلی افغانستان ایرکینلیگی نینگ ۱۰۱- ییللیگی نی تبریکلب کوپهیتیریشیچه «ایرکینلیک نی نشانلش» ۴۰ ییللیک اوروش نی یکونلنتیریش اوچون بیر سعی و حرکت دیر.
اونگه کوره، افغانستان رهبرلری و برچه تامانلر سابق خطالریدن اورگهنیب و بو مناسبتدن فایدهلنیب سیاسی بیر کیلیشوو گه قول تاپیشلری کیرهک.
او، سیاسی کیلیشوونی اوروش یکونلهنیشی و دایمی آتیش کیسین برقرار ایتیلیشی اوچون یالغیز «یول» دیگن.
افغانستان تینچلیگی بوییچه آمریکا خاص نمایندهسی نینگ کوپهیتیریشیچه، آمریکا تینچ بیر افغانستان نی ایستهیدی و تینچلیککه ایریشیش اوچون افغانستان اهالیسی نینگ همراهلیک قیلهدی.
خلیلزاد بوندهی بیاناتلرنی ارایه قیلگن بیرحالده، یکشنبه کونی ۲۹- اسد افغانستانلیکلرارا سوزلشوولر دوحه ده یولگه قوییلیشی گه قرار قیلینگن ایدی. بوندن آلدین دولت نینگ مذاکره قیلووچی هیأتی نینگ سلاموطندارگه ایتیشیچه، نابیللی دلیلر باعث افغانستانلیکلرارا سوزلشوولر آرتده قالدیریلگن.
بیراق طالبان گروهی ۴۰۰ محبوس قوییب یوباریلیش پروسهسی توختهتیلیشی نی افغانستانلیکلرارا سوزلشوولر گه توسیق بولگن دیگن.
افغانستان حکومتی مصلحتی لویه جرگه نینگ قراری اساسیده، حاضرگچه ۴۰۰ طالبان محبوسیدن ۸۰ تهسینی قوییب یوبارگن و باشقه محبوسلرنینگ قوییب یوباریلیشی قطار مملکتلرنینگ عکسالعمللریگه روپهرو بولگن.
ایکی کون آلدین جمهورلیک ریاست سوزلاوچیسی نینگ ایتیشیچه، افغانستان نینگ موضوعلریگه دخیل مملکتلردن قطاری ۶- ۷ محبوس نینگ قوییب یوباریلیشی توغریسیده اَیری توشونچهلری بار. شونینگدیک فرانسه و آسترالیا افغانستان حکومتیدن مذکور مملکت یشاوچیلری نینگ هلاک ایتیلیشی گه عیبلنگن طالبان محبوسی نینگ قوییب یوباریلمهسینی سورهگن.
