بوگون شنبه کابلده یوزلب ناگران ماین خطرلریدن خبردار قیلیش خلق ارا کونی مناسبتی بیلن ناراضیلیک نمایش اوتکزدیلر.
اولر، دولتدن حق حقوقلری آیاق آستی قیلینمس لیگینی سورهگنلر. مذکور ناراضیلیک نمایش ناگرانلرگه قرهشلی 55 مدنی اداره آرقهلی یولگه قوییلگن.
کوپچیلیگی ماینلر قربانی بولگن مذکور ناگرانلر، دولت تامانیدن آیلیکلری منتظم روشده توله نیلمسلیگینی ادعا قیلگنلر.
شونینگدیک ناگرانلر اوچون یشش بنا ترقه تیش لایحهسی عدالتلی بولمه گنیدن شکایت ایتگنلر. اعتراضچیلرگه کوره، عربلر تامانیدن شیخ زاهد شهرچه سیده ناگرانلر اوچون قوریلگن 233 آپارتمان، افغانستان ایش واجتماعی ایشلر وزیرلیگی آرقهلی علاقهلر اساسیده ترقه تیلگن.
دولت قراری اساسیده کابل قصبه شهرچه سی نینگ ییتی فایز یشش بنالری ناگرانلرگه ترقه تیلهدی. اوشبو بنالر 30 فایز تخفیف بیلن ناگرانلر اختیاریگه قویلیشی بیلدیریلگن. شونینگدیک مذکور ناگرانلر حکومتدن چیت ایلده دوالنه دیگن ناگرانلر اعتبار آستیگه آلینیب، یخشی دوالهنیشلری اوچون توجه قیلیشنی سورهگنلر.
اعتراضچیلر، ایستکلری اوچون حکومت اعتبار قرهتمه گن حالده، اوز نمایشلریگه دوام بیریشلری خصوصیده تاکیدله گنلر. ناگرانلر، ایش واجتماعی ایشلر بوییچه وزیرلیک سرپرستی نور محمد واصلگه کوره، افغانستانده حقلی ناگرانلر آز ایمس؛ اما، وزیرلیک برچه ناگرانلر اوچون بیر وقتده ییر همده تورر بنا ترقه تیب بیریش امکانیتیگه ایگه ایمس.
شونینگدیک جناب مومند، مملکت بویلب ناگرانلر برچهسی بیر دیک امتیازگه ایگه، برچه سینینگ حقوقی بیر سانده لیگینی تیلگه آلگن. وزیرلیک نینگ سرپرستیگه کوره، اوشبو ییش بنالر مخصوص کمیسیون تامانیدن آلینگن قرار اساسیده اینگ حقلی تَنیلگن ناگرانلرگه ترقه تیلهدی.
نمایش اوتکزگن ناگرانلر ییغین سونگی اون بیر موردلیک بیر لایحهنی جمهور رییسلیک سراییگه تقدیم قیلگنلر. قصبه شهرچه سیده یشش بنالرنی ترقه تیش توخته تیلیشی، ناگرانلر اوچون بنالرنی ترقته دیگنده مدنی ادارهلر هیاتی موجودلیگی، دولت ادارهلریده قابیلیت نظرده توتیلیشی، وزیرلیک نینگ معاونی ایشدن آلینیشی، سنا مجلسیده ناگرانلردن بیش نماینده تعین ایتیلیشی، سیلاولرده ناگرانلر اوچون شرایط یره تیلیشی، ایش جایلری، وزیرلیکلرده ناگرانلر اوچون سیاسی نمایندهلیک ایجاد ایتیلیشی و ناگرانلر فرزندلریگه چیت ایلده تحصیل زمینه سی یره تیلیشی جمهور رییسلیک سراییگه یوباریلگن قطعنامه دهگی موردلردن سنلهدی.
سونگی ییللرده ماین تینچ اهالی تلفاتی اوچون بیرینچی عامل ایکنلیگی ایتیلهدی. کابلده امیریکه ایلچیسی، انه شو مناسبت بیلن یازگن مقالهده 1989-ییلدن بیری افغانستانده 24 مینگ انسان ماین پارتلشی نتیجه سیده حیاتدن کوز یومگنلر.
رسمی حساباتگه کوره، افغانستان نینگ 30 میلیون نفوسیدن 2.7 فایزینی ناگرانلر تشکیل ایتهدی.
