قیشنینگ ساووقلریده کییملریمنی چیقرردی، باغلب یوزیمگه ساووق سوو تشلردی، کلتکلردی، سونگ یرهلریمگه قلمپر سیپیب ساووق اتاقده محبوس قیلردی. نظریده برچه ایرککلرنینگ آوازیدن قورقردی. خبرچی بیلن صحبت قیلگنده هم قورقینچ حالده. اوزینی دیوارگه یاپیشتیرگن. تیزهلرینی قوچاقلب آلگن بو عیال اوتمیشیدن سوز یوریتگنده اختیارسیز کوز یاشلری آقه باشلی دیر.
اسمی گلبشرهدیر. غزنی ولایتینینگ نابرقرار ولسواللیکلریدن بولمیش قرهباغدن شهرگه کیلیب، دردینی تینگلی دیگن دولت ادارهلریگه باش اورماقده. او، دولتدن کلتکلب کوزلرینی کور قیلگن تورموش اورتاغی اوشلهنیب جزالهنیشینی سورهماقده.
گلبشرهنینگ آته – آنهسی توییدن آلدین وفات قیلگن. ایکی کیچیک ایناغهسی قشاقلیک و کمبغللیک بیلن حیات کیچیرهدی.
گلبشره توییدن 15کون اوتگندن سونگ خوشلیک یوزینی کورمهگن، تورموش اورتاغی اونی اوریب کلتکلشگه باشلهگن. ایری ایرانده بولگن، او مملکتدن قیتیش بیلن قندهارگه کوچهدی.
مذکور خانمگه کوره، باشقهلر بیلن جنسی علاقهده بولگنلیک عیبی بیلن دایم تورموش اورتاغی تامانیدن کلتکلنگن.
گلبشره: «مین عدالت سورهیمن، نیمه اوچون مینگه بوندهی ظلم بولگن»؟
سونگی موردده، بوندن نیچه آی آلدین تورموش اورتاغی ساچینی قیریب، یوزیگه تیزاب سیپیب غزنیگه ایناغهلری یانیگه جونتهدی.
تیزاب گلبشرهنینگ کوزلرینی کور قیلگن و حاضر ایسه هیچ نرسهنی کورمیدی. اونینگ اوچون دادخواهلیک قیلهدیگن گلبشرهنینگ تاغهسی عبدالستارنینگ ایتیشیچه، 21آی آلدین ایریم ادارهلر جملهدن عیاللر، دولت باشقرهلاووچیلیگی و پولیس ادارهلریگه مراجعه قیلگن. اما، هنوزگچه هیچ بیر اداره بو توغریده همکارلیک قیلمهگن.
گلبشره تاغهسیگه کوره، اونینگ ایناغهلری کیچیک همده قشاق و کمبغللیگی سبب اونی درمانلش کوچیگه ایگه ایمس. اونگه کوره، گلبشرهنی کابلگه آلیب کیلیش همده دوسیهسینی تعقیب قیلیش اوچون پول قرض آلگن.
غزنی عیاللر ریاستی نینگ حقوقی مدیری فوزیه کاکرنینگ سلاموطندارگه ایتیشیچه، بو اداره گلبشره دوسیهسینی تیکشیرهدی و اونینگ تورموش اورتاغی عدلی وقضایی ادارهلر آرقهلی اوشلهنیشی صادر ایتیلگن.
خانم کاکرگه کوره، مذکور اداره گلبشره دوسیهسینی جاری ییل 21 سرطانده باشقرهلاوچیللیککه یوبارگنلر و حاضر ایسه مذکور دوسیه تیکشیروو آستیده دیر. عین حالده، غزنی باشقرهلاووچیلیک ادارهسی هم دوسیه تیکشیروو آستیده بولگن لیگینی تصدیق لهگن.
حاضر نابینا بولیب قالگن گلبشره نامعلوم کیلهجگی و ایناغهلرینینگ امنیتیدن خواطرده. او، فقط عدالت تطبیق ایتیلیشینی سورهدی. « مین عدالت سورهیمن، نیمه اوچون مینگه بوندهی ظلم بولدی؟»
