خبرچیلرنی سقلش کمیته‌سی رسمی‌لری‌نینگ ایتیشیچه، طالب‌لر قندوزده 13 میدیانی بوزیب وانشاعات‌لرینی آلیب کیتگن.
مذکور کمیته باشلیغی نجیب شریفی‌نینگ، (سه‌شنبه کون) کابل‌ده بیر خبری ییغینده ایتیشیچه، بوزیلگن 13 میدیا جمله‌سیدن، خاور تلویزیونی بیلن روشنی رادیوسی بوتونله‌ی نابود ایتیلگن.
اوشبو کمیته رسمی‌لری، یاردم بیرووچی اداره‌لردن قندوزده زیان کورگن میدیالرگه یاردم بیریش‌لرینی سوره‌دی. جناب شریفی، ملی و خلق ارا اداره‌لریدن اوشبو میدیالر قیته‌دن یایین بیریش خصوصیده، همکارلیک قیلیشینی ایسته‌دی.
خبرچیلرنی سقلش کمیته‌سی باشلیغی‌نینگ ایتیشیچه، قندوزده اوروش یکونلنگنی‌دن کیین، اوچ رادیو و ملی رادیو تلویزیونی بیلن نورین قیته‌دن یایین بیریش‌گه باشله‌گن.
باشقه تاماندن، قندوز میدیاچیلری، دولت و یاردم بیرووچی اداره‌لردن اولر قیته‌دن یایین بیریش خصوصیده، یاردم بیریش‌لرینی سوره‌دی.
طالبان گروهی 6- میزان، قندوز شهری اوستیگه اوچ تاماندن کینگ کولمده هجوم اویوشتیریب، 14 ییل‌دن کیین، مذکور ولایت مرکزی‌نی نظارت‌گه آلدی. اوشبو گروه جنگری‌لری اوچ کون قندوز شهریده قالیب، گزارشلرگه اساس، انسان حقوقلری جنایت‌لریگه قول اوریب و میدیالر اوستیگه هجوم اویوشتیرگن.
قندوز خلقی‌گه قوشیمچه، مذکور ولایت خبرچیلریدن کوپینچه‌سی اوروش جریانیده شهرنی ترک ایتکن و حاضر قیته‌دن یایین بیریش‌گه سعی و حرکت قیله‌دی. رقم‌لرگه کوره، قندوز میدیالری ایشچیلریدن 92 ته‌سی بلخ، بدخشان و کابل ولایت‌لری‌گه پناه بولگن.
