ترورچیلیک واقعهلر جریانیده حکومت تامانیدن میدیالرنینگ برابریده چیکلاو تعیین ایتیلیشی، میدیا مسؤوللرینینگ عکسالعمللریگه سبب بولدی. بوگون یکشنبه کابلده خبری بیر ییغین اوتکزگن افغانستان رادیو و تلویزیونلر بیرلیگی، میدیا و خبرچیلردن حمایت قیلووچی ادارهلردن بیرقطارینینگ ایتیشیچه، حکومت میدیالرنی سانسور قیلیش اوچون سعی و حرکت قیلهدی.
افغانستان رادیو و تلویزیونلر بیرلیگی باشلیغی مولانا عبدالله نینگ ایتیشیچه، حکومت و میدیالر خوفسیزلیگینی تأمینلش قوشمه کمیته تامانیدن امنیتی کوچلر، خبرچیلر و حکومت رسمیلرینینگ قوروقچیلری آرهسیده لفظی و بدنی تارتیشوولر آلدی آلینیشی اوچون تیارلنگن لایحهنینگ اوچینچی جزء 4- ماده اساسیده، میدیالر ترورچیلیک واقعهلر جریانیده گزارش یا-ده صورت نشر قیلمسلری کیرهک. بیراق میدیا مسؤوللرینینگ ایشانچی گه کوره، اوشبو مادهنینگ مطلبی سانسور قیلیشنی کورستهدی و اساسی قانون گه قرشی دیر و ماده نینگ بو بندی لایحهدن چیقاریلیشی لازم.
بیراق، جمهورلیک ریاستینینگ مطبوعات دفتری سرپرستی شاهحسین مرتضوی، بو لایحهدن مقصد میدیالرنی سانسور قیلیش ایمس؛ بلکیم ترورچیلیک واقعهلر جریانیده خبرچیلرنینگ جانلرینی سقلش دییدی.
باشقه تاماندن، بو سوزنی میدیا مسؤوللری یالغیز بیر تبلیغ دیب بیلهدیلر. اولرنینگ ایتیشیچه، میدیالرگه قرشی تهدیدلر میزانی آشگنده، حکومت بو توغریده هیچ بیر ایش قیلمهگن و شونینگدیک، 9- ثورده یوز بیرگن واقعه ده 9 خبرچی هلاک ایتیلگنده هم توغری بیر گزارش بیرمهگن.
عین حالده، سرور دانشنینگ ریاستیده بولگن کمیته، میدیالرنینگ ایستکلرینی نظرگه آلمسدن بو لایحهنی ترورچیلیک و اوروش جریانیدن خبر ترقهتیش لایحه نامیده تصدیقلگن.
