د ژنیو کنفرانس ته غوره شويو مدني فعالانو نن کابل کې خبري غونډې ته وویل چې افغان حکومت داسې مهال په ژنیو کنفرانس کې ګډون کوي چې د ۲۰۱۶ کال د بروکسل کنفرانس ژمنې یې نهدي عملي کړي.
دوی ادعا کوي چې د ملي یووالي حکومت د قانون پلي کولو د اداري فساد پرضد مبارزه، د بېوزلۍ کمولو، د ټاکنو روڼتیا او امنیت ټینګښت کې پاتې راغلی دی.
د ژنیو کنفرانس ته غوره شوی مدني فعال محمدنعیم ایوبزاده وایي، د مدني بنسټونو موندنې ښیي چې حکومت له نړۍوالې ټولنې سره کړې ژمنې نهدي پوره کړي.
دی وایي، بېوزلي، وزګارتیا او ناامنۍ زیاتې او وطنوالو ته معیاري خدمتونه نهدي برابر شوي.
د ژنیو کنفرانس ته د مدني فعالانو تلونکي پلاوي پرېکړهلیک کې راغلي چې د ۳۴ ولایتونو مدني فعالان د جګړې پای ته رسېدل غواړي.
د پرېکړهلیک یوه برخه کې راغلي، ښه حکومتوالي، سمون او په ټاکنو کې رڼښت، له فساد سره مبارزه، د سیاسي ټیکاو لهپاره د سمون ستراتېژي پراختیا او د افغانستان کورنیو سرچینو پهواسطه اقتصادي وده او بوختیا رامنځته کېدل له دولت او نړۍوالې ټولنې د مدني فعالانو غوښتنې دي.
مدني بنسټونه د دولت پر کړنو د څار په موخه له نړۍوالو د ملاتړ غوښتونکي دي او دغه بنسټونه په ژنیو کنفرانس کې د ولس خپلواک غږ دی.
خو د ولسمشر مرستیال ویاند شاهحسین مرتضوي سلام وطندار ته وویل حکومت په ټولو برخو کې لاستهراوړنې لري په تېره د قانون سمون او د فساد ضد مبارزه کې یې د پاموړ پرمختګ کړیدی.
د ده په خبره، دا ستر پرمختګ دی چې نږدې ۴۰۰ قوانین له سره کتل شوي او سم شوي او د فساد ضد مبازه کې ۱۵ زره لوړ پوړیو چارواکیو خپلې شتمنۍ ثبت کړېدي.
د ژنیو کنفرانس ته د غوره شویو مدني فعالانو په وینا، د وطنوالو نظرونو راټولولو په موخه یې په ۳۴ ولایتونو کې له ۱۱۷۰ مدني مدني بنسټونو سره خبرې کړېدي.
ټاکل شوې، د روانې نومبر پر ۲۷ او ۲۸ نېټه د سویس په ژنیو ښار کې د افغانستان په اړه نړۍوال کنفرانس جوړ شي.
