اسمی سِر سقلهنیش شرطی بیلن سلاموطندارگه صحبت بیرگن اسلامی حزبیگه یقین بیر منبع، حکومت اخیرگی وقتلرده اوشبو حزبنینگ نمایندهلری بیلن قیلگن ملاقاتده بولردن رسمی کابل – واشنگتن اورتهسیده قول قوییلگن بیتیمنی حمایت قیلیشلرینی سورهگن دیگن.
اما، منبعنینگ بیلدیریشیچه، گلبدین حکمتیار رهبرلیگیدهگی اسلامی حزبی، حکومتنینگ بو ایستهگی نی رد قیلیب، باشقه هر بیر دولت بیلن امضالنگن بیتیملرنب حمایت قیلیشنی بیلدیرگن. لیکن، بو حزب امریکه بیلن امضا ایتیلگن بیتیم اوچون هلی معین قرارگه کیلمهگن.
عین حالده، افغانستان عالی تینچلیک کینگشینینگ اورین باسری عبدالخبیر اوچقون، مملکتدن خلق ارا کوچلرنی آلیب چیقیش و رسمی کابل – واشنگتن اورتهسیده امضالنگن شرطنامه اسلامی حزبی بیلن بولگن مذاکره لرده افغانستان دولتینینگ قیزیل چیزیغی دییلگن.
اونینگ سوزلریگه کوره، اسلامی حزب هیاتی بیلن بولگن ملاقاتده تینچلیک مذاکرهسی متنی اوستیده کیلیشیلگن ایدی؛ اما، اسلامی حزبی نینگ نماینده لری پاکستاندن قیتیش بیلن ینگی طرحلرنی ایلگری سورگنلیگی حکومت تامانیدن رد ایتیلگن.
عالی تینچلیک کینگشینینگ اورین باسری، اسلامی حزبینینگ هیاتی حاضر کابلدن کیتگن، اولر بیلن ینه تینچلیک مذاکرهسی اوتکزیش وقتی انیق ایمس دیگن.
بوگون افغانستان اخبارات واسطهلرینینگ ترقتگن گزارشیده اسلامی حزبینینگ رهبری تینچلیک مذاکرهسیگه عاید متننی تَن آلمهگنی قید ایتیلگن. بو موضوع افغانستان دولتی بیلن اسلامی حزب اورتهسیدهگی مذاکره نتیجه بیرمهگن لیگینی انگلتهدی.
