کابل شهری نینگ غربی حدودیده جایلشگن باقرالعلوم مسجدیده صادر ایتیلگن هجومده قربان بولگنلرنی توپراققه تاپشیریش مراسمیده صحبت قیلگن مملکت نینگ بیر قنچه اهالیسی، حکومت حقیقتنی تاپیش کمیسیون ایجاد قیلیش بیلن اهالیگه جواب بیریشدن قاچهدی دیگنلر.
اولر، هر بار انتحاری هجوم صادر ایتیلیشی آرتیدن حکومت حقیقتنی تاپیش کمیسیون ایجاد قیلیشگه اولگورهدی، حال بوکه مذکور کمیسیونلر هیچ بیر حقیقتنی فاش قیلمهگن دیدیلر.
داعش تودهسی بوینگه آلگن هجوم بوندن ایکّی کون آلدین باقرالعلوم مسجدی ایچیده صادر ایتیلگن ایدی. اوشبو انتحاری هجوم عاقبتیده اساسن شبعه مذهبلرگه قرهشلی 30 کیشی قربان بولیب کمیده 85 انسان یرهلنگن ایدی. قربانلر بعضیسی نینگ جسدی بوگون توپراققه تاپشیریلدی.
هجومده قربان بولگنلرنی توپراققه تاپشیریش اوچون تشکیل بولگن کمیسیون نینگ بیاناتیده، خلق حقیقتنی ایزلش کمیسیون ایمس، بلکه اهالی مالی و جانی خوفسیزلیگی تامین ایتیلیشینی سورهیدیلر دییلگن.
مراسم اشتراکچیلری نینگ سوزلریگه کوره، قربانلرنینگ بیر قنچه خانهدان اعضالری بو قبیل ییغینلرده دولت بلند مرتبهلی رسمیلری نینگ سیاسی نیتده اشتراک قیلیشلری اوچون بو مراسمگه کیلمهگنلر.
مملکت اهالیسی ترورچی گروهلر آرقهلی اولدیریلیشینی بشریتگه قرشی بیر جنایت دیگن قربانلر جسدینی توپراققه تاپشریش اوچون تشکیل بولگن کمیسیون نینگ اعضاسی محمداسلم شیوا، دنیا همجمعیتی ینه انسان حق و حقوقلری تشکیلاتیدن بو گروهلرنی حمایت قیلهدیگنلر جزالهنیشینی سورهگن.
اجراییه ریاستی نینگ ایکینچی اورین باسری محمدمحقق، اهالینی اولدیریش نینگ ینگی تولقینلری نینگ ینگی بیر فصلنی اوزیگه آلگن دیدی.
نمایندهلر مجلسی نینگ اعضالری هم بوگون پارلمان نینگ عمومی ییغینیده بیر بیانات نشر قیلیب، امنیتی ادارهلردن گناهسیز خلق اولدیریلیشی آلدی آلینیب دشمنلرگه ایرمه چیلیک فرصتی بیریلمسلیگی اوستیده تاکید ایتگنلر.
شونینگدیک ایچکی ایشلر وزیرلیگی هجومگه عکسالعمل بیلدیریب، پولیس آلتینچی حوزهسی مسووللریدن آلتی کیشینی ایشدن آلگن.
