سیاسی ایش بیلرمانلر، اداری فساد کمهییشی، تونیقلیک ایجاد ایتیش و مردمی حکومت تشکیل ایتیلیشی خصوصیده سابق حکومت بیلن ملی بیرلیک حکومت کوچسیزلیگی، افغانستان اوچون دنیا جماعهچیلیگی دقت سیزلیگیگه باعث بولگن دییدی.
اوشبو بیانات لر، بیرلشگن ملتلر تشکیلاتی خاص نمایندهسی نیکولاس هیسم، افغانستان کیلهجکی توغریسیده خواطر بیلدیرگن بیرچاغده بیان ایتیلگن. هیسمنینگ، بیرلشگن ملتلر تشکیلاتی امنیت کینگشیده گزارش بیریش ییغینیده ایتیشیچه، افغانستانگه خلق ارا جماعهچیلیگی تامانیدن یاردم بیریلیشی لازم، چونکه اوشبو مملکت ثباتی دنیاجماعهچیلیگینینگ یاردمیگه باغلیق بولیب تورگن.
سیاسی ایش بیلرمان و بیلیم یورت استادی فاروق بشرنینگ سلاموطندارگه ایتیشیچه، حکومتدهگی زورهوان کیشیلر تاماندن دنیاجماعهچیلیگی یاردملری ییلیشی، دنیاجماعهچیلیگی خواطرینی کوپهیتیرگن. جناب بشرگه کوره، حاضرگی شرایطده دنیا یاردملری کیسیلگن صورتده، تیزیم اورتهدن کیتیشی ممکن.
سیاسی ایش بیلرمان و بیلیم یورت استادلریدن باشقه بیری نصرالله استانکزی سلاموطندار بیلن اوتکزگن صحبتیده، دنیا جماعهچیلیگی یاردمی دوام ایتیشی و مملکت وضعیتی یخشیلنیشینی ملی بیرلیک حکومت باشلیغلرینینگ یوتوقلری و سوزلریگه باغلیق دیب بیلهدی. جناب استانکزیگه کوره، سونگی 14 ییل یوتوقلری، دنیاجماعهچیلیگی یاردملری و ملی بیرلیک حکومت باشلیغلرینینگ کوچلی ارادهلریگه باغلیق بولیب تورگن.
ایش بیلرمانلرگه کوره، ناتینچلیکلر کوپهییشی، اقتصادی قیینچیلیک، ملی بیرلیک حکومت باشلیغلرینینگ سیاستلری ناکاملیگی، حاضرگی وضعیتگه قرهگنده یشاوچیلر ایشانچ سیزلیگی و قوشنی مملکتلر حمایت سیزلیگی، افغانستان کیلهجکی اوچون دنیاجماعهچیلیگی و یشاوچیلر ایشانچ سیزلیگیگه سبب بولگن.
