بوگون (چهارشنبه) افغانستان حقوقچیلر جمغرمهسینینگ اعضالری کابلده بیر خبری ییغین اوتکزیب، عملدهگی ملی بیرلیک حکومتینی وجودگه کیلتیرگن سیاسی کیلیشوونینگ هیچ بیر مادهسی عملگه تطبیق ایتیلمهگن دیگنلر.
افغانستان حقوقچیلر بیرلشمهسینینگ اورین باسری جنرال گلاحمد مددزینینگ ییغینده گپیریب ایتیشیچه، ملی بیرلیک حکومتی رهبرلری سیاسی کیلیشوونینگ مادهلریگه عمل قیلمهگن حالده، حاضرگی حکومت هم یریم قانونیلیگینی قولدن بیریشی ممکن.
ملی بیرلیک حکومتی رهبرلریدن شخصی ضدیتلریگه پایان بیریشنی سورهگن جناب مددزی تیزلیکده سیاسی شرطنامه مادهلرینی عملی قیلیشلرینی طلب ایتگن.
مملکت حقوقچیلر بیرلشمهسینینگ رهبرلیک اعضاسی عبدالواحید فرزهیی، ملی بیرلیک حکومتی رهبرلرینینگ اورتهسیدهگی موجود قرمه قرشیلیک مملکت خلقینینگ منفعتیگه ایمس، بلکه افغانستاننی بحران تامان یونلتیرهدی دیگن.
لویه جرگه اوتکزیلیب اساسی قانونگه اوزگریش کیریتیلیشی بارهسیده تاکید قیلگن جناب فرزهیی، لویه جرگه اوتکزیلیب اساسی قانونگه اوزگریش کیریتیلمسدن آلدین پارلمانی همده تومنلر کینگشی سیلاولری اوتکزیلیشی بارهسیده علیحده تاکید قیلگن. شونینگدیک او، پارلمان ینه تومنلر کینگشینینگ نمایندهلری تنلنمهگن حالده، لویه جریگه اوتکزیش زمینهسی یرهتیلیشی امکاندن اوزاق دیگن.
افغانستان حقوقچیلر بیرلشمهسینینگ اعضالری، ایکّی ییل جریانیده ملی بیرلیک حکومتینینگ رهبرلری یخشی حکومتچیلیک قیلیش اوچون موفق بولمهگنلیکلری باعث لویه جرگه اوتکزیلیب اساسی قانون اوزگرتیریلیشیدن قورقه دیلر دیگنلر.
لیکن، حکومتنینگ رهبرلری لویه جرگه اوتکزیلیشی اوچون دایمی سیاسی ارادهلریده مستحکم ایکن لیکلرینی اعلان قیلگنلر.
قویاش 1393- ییلده اوتکزیلگن جمهور رییسلیک سیلاولر جنجالگه روپه ره بولگندن کیین، امریکا قوشمه ایالتلری تشقی ایشلر وزیری جانکری نینگ واسطهچیلیگی بیلن عبدالله عبدالله و داکتر اشرفغنی سیاسی کیلیشوو اساسیده ملی بیرلیک حکومتنی تشکیل قیلیشگه موفق بولدیلر.
