د ملي یووالي حکومت د ر امنځته کېدو پرمهال دواړو مشرانو د سیاسي هوکړې پرمهال ژمنه کړې، چې حکومت به د اساسي قانون بدلون په موخه لویه جرګه راوغواړي.
د حکومت مشرانو ژمنه کړې، چې د دوو کلنو په موده کې باید اوسنی جمهوري نظام په صدارتي نظام بدل شي.
د حراست او ثبات شورا نن دوشنبه ( جنوري ۱۱مه) کابل کې د بیلا بیلو ولایتونو څخه رابلل شوي استازو د غونډې پایله ددې شورا ویاند مسعود ترشتوال له رسنیو سره شريکې کړې.
ترشتوال وايي، د حراست او ثبات شورا ټينګارکوي، چې ۱۳۹۵ لمریز کال کې د ملي یووالي حکومت دوه کلن کیږي، خو د لویې جرګې راغوښتلو له پاره یې لیوالتیا نه لیدل کیږي.
ده وویل، چې د ملي یووالي حکومت د سیاسي هوکړې له مخې رامنځته شوی، خو اوس باید خپلې ژمنې سره سم د لویې جرګې را بللو ته پوره چمتوالی ولري.
ترشتوال زیاته کړه، که حکومت د لویې جرګې راغوښتلو کې پاتې راغلی باید د حراست او ثبات شورا ته مراجعه وکړي او دغه شورا بیا دا وړتیا لري، چې د نوي ظرفیت سره د حل لار ورته پيداکړي.
" د حراست او ثبات شورا دريځ دا دی، که دولت په دې اړه نه شي کولای، چې د اساسي قانون بدلون له پاره لویه جرګه راوبلي" د حراست او ثبات شورا ته دې مراجعه وکړي او د دوی په وینا دغه شورا دا وړتیا لري چې په همکارۍ سره نوې لار ورته وښايي او لویه جرګه جوړه شي.
د حراست او ثبات په نوم دغه شورا د تخصصي صدارتي نظام پر رامنځته کېدو ټينګار کوي.
د دې شورا استازو هغه څرګندونې رد کړې، چې کواکي دغه شورا د نظام د سقوط " ړنګېدوو" په هڅه کې ده.
د حراست شورا ویاند اجمل سایس وایي د نظام سقوط د افغانستان د هېڅ وګړي په ګټه نه دی، خو زیاتوي چې اوسنی وضعیت هم ورته د منلو وړ نه دی.
په همدې اړه د حراست او ثبات شورا له حکومته و غوښتل، چې د ولسي جرګې ټاکنې وخت دې له دوبي ته رامخته کړي.
دوی غوښتنه کوي، د مني او ژمي په منځ کې ټاکنو پر وړاندې د سړې هوا له امله ناامني پرخوالی مومي او ښايي ټاکنې وځنډیږي.
د حراست او ثبات شورا اندیښنه لري، چې د حکومت د دې کړنو داسې څرګندیږي، چې د ولسي جرګې ټاکنوترسره کولوته هوډ نه لري.
