سلام‌وطندار نماینده‌لر کینگشی نینگ 16- دوریدن حجت و سندلرگه قول تاپگن کیم اونینگ کورستیشیچه، نماینده‌لر کینگشی نینگ 134 سابق اعضاسی نماینده‌لیک دوری یکونلنگنیدن کیین، حکومتی حربی جهازلرنی تسلیم بیرمه‌گن.
مذکور سندلر اساسیده، کمیده 417 کلاشنیکوف، 138 تفنگچه، 13 رنجر موتر ، 75 واکی تاکی مخابره، 152 موتر جمری، 17 کانتینر، 40 بسته تیکانلی سیم، 4 کانکریتی دیوار، 3 الکترونیکی ایشیک و باشقه قطار جهازلر حکومتی حربی جهازلر دیر کیم حاضرگچه نماینده‌لر کینگشی نینگ امنیتی بولیمی گه تاپشیریلمه‌گن.
مذکور رویخط ده ایش و اجتماعی ایشلر وزیری سیدانور سادات، فاریاب حاکمی نقیب‌الله فایق، بدخشان حاکمی محمد زکریا سودا، بلخ حاکمی محمداسحاق رهگذر، قزاقستان ده افغانستان نینگ ایلچیسی فرهاد عظیمی، جمهوررئیس غنی نینگ ییریک مصلحتچیسی محمدالماس زاهد، ملی مصالحه کینگشی نینگ بیرینچی اورین‌باسری عنایت‌الله بابر فرهمند و ایکینچی اورین‌باسری اسدالله سعادتی، شکریه بارکزی، هیلی ارشاد، محمدظاهر قدیر، همایون همایون و ملاتره‌خیل نینگ آت‌لری کورینه‌دی.
نماینده‌لر کینگشی نینگ دارالانشا مسئوللری گه کوره، حکومت نینگ حربی جهازلرینی تسلیم قیلیش توغریسیده رد جواب بیرگن کیشیلر، رسمی نامه‌لر آرقه‌لی، جمهورلیک ریاستی، ایچکی ایشلر وزیرلیگی، ملی خوفسیزلیک عمومی ریاستی و باش قاره‌لاوچیلیک‌که تانیشتیرگنلر، بیراق حاضرگچه اوشبو نماینده‌لردن هیچ بیری جهازلرینی تاپشیرمه‌گن.
نماینده‌لر کینگشی نینگ 16- دوری ده ننگرهار ملت وکیلی عبدالظاهر قدیر، وکیل‌لیگی جریانیده 15 میل کلاشینکوف، 18 میل تفنگچه، 32 مخابره و 6 جمر نی اختیاری گه آلگن ایکن کیم او بو رویخط نینگ باشی گه قرار تاپگن و حاضرگچه بو امکانیت‌لرنی دولت گه تاپشیرمه‌گن.
نماینده‌لر کینگشی نینگ 16- دوری ده کابل یشاوچیلری نینگ نماینده‌سی شریف‌الله کامه‌وال، 9 میل کلاشنیکوف، 4 میل تفنگچه و بیر کانکریتی دیوار نی حاضرگچه تاپشیرمه‌گن.
کینگش نینگ 16- دوری ده قندوز ملت وکیلی شایسته‌باز ناصری،11 میل کلاشینکوف و بیر جمر نی قیته تاپشیرمه‌گن.
شونینگدیک هرات ملت وکیلی احمد بهزاد، 7 میل کلاشنیکوف، 3 میل تفنگچه، ایکی مخابره و بیر جمر نی تسلیم بیرمه‌گن.
مذکور کینگش نینگ 16- دوری ده پکتیا یشاوچیلری نینگ نماینده‌سی گل‌پادشاه مجیدی، 8 میل کلاشنیکوف، بیر تفنگچه، 4 مخابره و 2 کانتینر نی قیته بیرمه‌گن.
کینگش نینگ دارالانشا باشلیغی عبدالقادر زازی وطندوست نینگ ایتیشیچه، نماینده‌لر کینگشی نینگ 16- دور نماینده‌لری، اولرنینگ ایسته‌کلری و نامه‌لری گه توجه قیلمه‌گن.
بیراق فاریاب حاکمی نقیب‌الله فایق سلام‌وطندار بیلن صحبت اوتکزیب ایتیشیچه، کمیده بیر ییل آلدین میمنه پولیس قومندانلیگی آدرسی‌دن بیر مکتوب کیلگنیدن کیین، وکیل‌لیک دوره‌سی نینگ قوراللری نی تسلیم بیرگن.
بیراق گل‌پادشاه مجیدی نینگ ایتیشیچه، حاضرگچه کینگش، ایچکی ایشلر وزیرلیگی و باشقه نهادلر تامانیدن حربی جهازلرنی تاپشیریش خصوصیده هیچ قنده‌ی نامه کیلمه‌گن. جناب مجیدی گه کوره، امنیتی تهدیدلر باعث اولر حاضرگچه قوراللری نی کینگش گه تاپشیرمه‌گن، بیراق هر زمان اولردن درخواست قیلینگن صورتده، دولتی امکانیت‌لرنی تاپشیره‌دیلر.
افغانستان ایچکی ایشلر وزیرلیگی بو توغریده سلام‌وطندارنینگ قونغوراق‌لریگه جواب بیرمه‌دی. بیراق باش‌قاره‌لاوچیلیک سوزلاوچیسی جمشید رسولی نینگ سلام‌وطندارگه ایتیشیچه، بو حقده اولرنینگ آلدیگه هیچ قنده‌ی دوسیه یوق دیر.
اوشبو گزارش حقیده نماینده‌لر کینگشی نینگ 16- دور اعضالری نی فکرینی اورگه‌نیش ایسته‌دیک، بیراق عبدالظاهر قدیر شامل اولردن قطاری مملکتدن تشقی ایکن، باشقه قطاری ایسه قونغوراق‌لرگه جواب بیرمه‌دی و بولرنینگ آره‌سیدن محمداسحاق رهگذر، احمدبهزاد و باشقه بیر قطارلری ایسه سلام‌وطندارنینگ قونغوراغی گه جواب بیردی، بیراق سوزلش گه حاضر بولمه‌دی.
بو گزارش نشر بولگن بیر حالده، سونگی پیت‌لرده نماینده‌لر کینگش اعضالری نینگ یقیین‌لریدن قطاری حربی جهازلر بیلن عمومی امنیت نی بوزیش چاغیده کورینگن.
