د جوزجان ولايت منګجيک ولسوالۍ کې وسلهوالو طالبانو د ږيرې پر خرېيلو، موسيقي اورېدلو او د سينګار توکيو پر کارولو بنديز لګولی دی.
د ياد ولايت د منګجيک ولسوالۍ د محلي ادارې مسوولان سلاموطندار ته وايي چې طالبانو د يادې کړنې ترسره کولو لپاره په دې ولسوالۍ کې ۱۲ ځايه د تلاشۍ پوستې جوړې کړې دي او هغه کسان چې له ياد امر نه سرغړونه وکړي، جزا ورکوي.
د منګجيک ولسوال مطیعالله احسان وايي، د طالبانو ياده پرېکړه د دعوت او ارشاد له غونډې وروسته کړې ده.
د جوزجان اوسېدونکي د طالبانو له لوري پر دوی وضع شوي محدوديتونه د انساني ارزښتونو پر خلاف ګڼي او وايي چې د ږيرې پرېښودل او نه پرېښودل شخصي کړنه ده او طالبان نه بايد خلک دې کار ته اړ کړي.
د منګجيک ولسوالۍ يو شمېر اوسېدونکي سلاموطندار سره خبرو کې وايي چې طالبان پر دوی خپل شخصي قوانين تطبيقوي چې دا کړنه د خلکو د زورونې لامل کېږي.
د طالبانو له لوري پر خلکو د محدوديتونه نوې خبره نه ده او د کابل له نيولو وروسته د وسلهوالو طالبانو د پوهنې وزير ليکلي وو چې: « طالبان له موسيقۍ سره مخالف دي ځکه چې فکر ګډوډوي او د اسلامي اصولو مخه نيسي.»
خو د وسلهوالو طالبانو يو وياند ذبیحالله مجاهد د منګجيک ولسوالۍ د محلي مسوولانو دا ادعا ردوي.
