جوزجان کې یوشمېر ښځینه فوټبالرانې وايي، د ځانګړيو ځایونو او مالي ملاتړ کوونکیو نهموجودیت، په سپورټي لوبغالو کې د دوی د کمرنګۍ لامل شوي دي.
د دوی په وینا، دې ولایت کې د ښځینهوو سپورټ لهپاره مناسب ځای او نورې لازمې اسانتیاوې نهشته او څوک یې غوښتنو ته هم غوږ نهنیسي.
دغه فوټبالرانې وايي، اوس د ۴۰ ښځینه لوبغاړو له ډلې یوازې ۱۰ یې پاتې دي.
فرشته نظري او مهر انګېز چې جوزجان کې سپورټ کوي وايي، د لوبو لهپاره ځانګړی او مناسب ځای نهلري، مالي ملاتړ یې نهکېږي او د سیالیو لهپاره چې نورو ولایتونو ته ځي، هم خپلې پیسې لګوي.
دوی له حکومت او مسوولو ادارو غواړي چې د ښځینهوو لوبډلې بېرته جوړې او لهپاره یې ځانګړي لوبغالي جوړ کړي.
په همدې حال کې د جوزجان ولایت په مقام کې د جندر برخې کارپوه زویا زلال هم وايي چې دې ولایت کې د ښځینهوو د فوټبال لهپاره لازمې اسانتیاوې نهشته او مسوولان باید ورته پام وکړي.
خو د جوزجان د فوټبال فدراسیون مسوول امانالله فیضي وايي، د هلکانو په سپورټي لوبغالي کې یې د ښځینهوو لهپاره هم ځای ځانګړی کړی و، خو د مدیریت نه موجودیت له کبله د ښځینهوو لوبډلې سره وپاشل شوې.
نوموړی زیاتوي، که څه هم د ښځینهوو لهپاره ځانګړي ځایونه نهلري، خو د اوونۍ په اوږدو کې یې د څو ساعتونو لهپاره ورته د هلکانو لوبغالي ځانګړې کړي دي.
موږ وغوښتل چې په دې اړه د ښځینه ورزشکارانو د کمېټې مسوولې زولیا صمیمي نظر هم واخلو، خو له هڅو سره سره، ونه توانېدو.
جوزجان کې د ښځو برخې یوشمېر فعالانې دې ولایت کې د ښځینهوو د فوټبال فعالیتونو کمولو په اړه اندېښنه ښيي او وايي، سپورټ ته د ښځېنهوو د جذب او هڅونې لهپاره باید د پاموړ کار وشي او ورته لازمې اسانتیاوې برابرې شي.
