ایرته‌لب قویاش کورینیشی بیلن کوپینچه بنگی‌لر شبرغان شهری‌نینگ ویرانه منطقه لریده کورینه‌دی. بنگی‌لرنینگ توپله‌نیشی ینگی موضوع؛ بلکیم نیچه ییل آلدین اولر شهرگه کیلمس ایدی. بنگی‌لر آره‌سیده باله‌لر هم کورینه‌دی. اوشبو باله‌لر بنگی‌لر بیلن اوین اوینه‌میدی؛ بنگی‌لرنی اذیت قیلمیدی و اولرنینگ تماشا قیلیش اوچون هم کیلمه‌گن‌لر؛ بیراق اولر، او ییرلرده بنگی‌وار ماده ساته‌دیلر.
بشیر(مستعار اسم) 12 یاشر باله‌دیر. او یرته‌دن آقشام گچه شبرغان کوچه‌لریده بنگی‌لر آره‌سیده بنگی‌وار ماده‌لرنی پاکت توزه‌تیب پاکت‌لرنی بنگی‌لر گه ساتیب عایله‌سی‌نینگ خرجتی‌نی تامین قیله‌دی.
بشیرنینگ ایتیشیچه، هرکون 30 یا-ده 40 تیارلنگن پاکت نی تسلیم آله‌دی و اونینگ 50، 100 و 150 افغانی گه‌قدر ساته‌دی. مذکور پاکت‌لرنی ساتگن دن سونگ 100 دن 200 افغانی گه‌قدر پول آلیب عایله سیگه آذقه تیارلیدی.
بیرتاماندن بنگی‌لرنینگ توپله‌نیشی و باشقه تاماندن بنگی‌وار ماده‌لر قاچاقچی‌لری‌نینگ باله‌لردن قوله‌نیشی جوزجان اهالیسی نی خواطر گه تشله‌گن. اولرنینگ دولت‌نی شونینگ‌دیک وضعیت لر گه مسوول بیلیب ایتیشیچه، دولت قاچاقچی لرنی جزالنتیریش و قانونی عمل‌گه آشیریش اوچون دقت قیلمه‌گن، اولرگه کوره، باله‌لر و اوقووچی‌لرنینگ سلامت‌لیگی و حیاتی خطر بیلن دوچ کیلیب و اولرگه یخشی فعالیت قیلیش اورنیده بنگی‌وار ماده‌لر ساتیش زمنیه‌سی یره‌تیلگن.
جوزجان ولایتی بنگی‌وار ماده‌لر گه قرشی کوره‌ش اداره باشلیغی زرغونه هاشمینینگ اهالی خواطرلر خصوصیده ایتیشیچه، باله‌لر دن قوله‌نیش کته قینچیلیک دیر و حاضرگی وضعیت باله‌لر کیله‌جگی نی نابود قیله‌دی.
هاشمی گه کوره، باله‌لردن قوله‌نیش گه توسیق ایتلمه‌گن حالده، اوشبو باله‌لر کیله‌جکلرده خطرناک قاچاقچی بولیب هر قندی ایش‌گه قول اوره دیلر.
جوزجان پولیس قومندانلیگی‌نینگ خوفسیزلیک آمری عبدالحفیظ خاشی‌نینگ ایتیشیچه، بنگی‌لر هر یول بیلن نیازلری بولگن ماده‌لرنی قولگه کیلتیره‌آله‌دی؛ بیراق باله‌لرنی بنگی‌وار ماده‌لر ساتیش اوچون استخدام قیلگن کیشی‌لرنی جوزجان پولیسی تامانیدن قولگه آلینیب عدلی و قضایی نهادلریگه تانیتیلیشی ممکن.
عین‌حالده، انسان قاچاقی و قاچقین‌لر سکرتریت‌نینگ مسوولی حسن سلیمی‌نینگ ایتیشیچه، باله‌لر دن قوله‌نیش، جنسی زوره‌وانلیک و باله‌لرنی اجباری ایش‌لرگه زورلش انسان قاچاقی حسابله‌نیب و اولرنینگ عامل‌لری قانونگه کوره جزالنتیریله‌دی.
انسان قاچاقی گه قرشی کوره‌ش قانون‌نینگ 5 – فصل‌گه کوره، انسان قاچاقچی لرینی خلق‌ارا نهادلر همکارلیگی بیلن کشف ایتیب جزالنتیریش دولت و مسوول بولگن واحدلرنینگ مسوولیت لریدن دیر.
بیراق جوزجان ولایتی‌نینگ مدنی فعال‌لریدن بیرقطاری، محلی حکومت ایچی‌ده قطار منبع لر باله‌لرنی بنگی‌وار ماده‌لرنی ساتیش‌گه استخدام قیلیش اوچون قول‌لری بار و اولرنینگ بنگی‌وار ماده‌لر باندلری بیلن رابطه‌لری بولیشی ممکن.
