بغلان ولایتینینگ مرکزی پلخمری و دوشی تومنینینگ کلانگذر منطقهلری یشاوچیلریدن بیرقطارینینگ ایتیشیچه، دولتنینگ مینگلرچه جریب ییری، دولتی جایدادلر و بو منطقهلرنی شخصی املاکی، زورهوانلر و فرصت طلب کیشیلر تامانیدن تورلی شکلده ساخته حجت و حکومتی ادارهلردن بیرقطارینینگ همکارلیگی بیلن غصب ایتیلگن.
پلخمری دینگیزینی سول تامانی و دوشی تومنینینگ کلانگذر منطقهسی یشاوچیلری، مدرک و حجت ارایه ایتیب سلاموطندارگه ایتیشیچه، ییللر بوییچه مملکتنینگ قضایی قوریلمهسی و دیوانیده سرگردان یورگنلر؛ چونکه بغلان ولایتینینگ قارهلاوچیلیک مسؤوللری، دوسیهلریگه دقت قیلمهگن.
مذکور منطقه یشاوچیلری تامانیدن آغاخان دفتری (AKDN) گه یوباریلگن عریضهده کیلیشیچه، «آغاخان دفتریده اهالی نمایندهسی قومندان غلامنظر، دولتی ییرلر، اوتلاقلر، جماعتخانه املاکی و شخصی ملکیتلرنی غصب قیلیب و اولردن بیر بولیمینی ساتیب اوزیگه اوی، باغ و شهرچه قورگن.»
اوشبو عریضهنی باشقه بیر بولیمیده ادعا بولیشیچه، غلامنظر آغاخان دفتریده ایشگه باشلهگنیدن، ساختهکارلیک و پلخمری بیلن کلانگذر یشاوچیلرینی الدهش ایشلری بیلن اورونهدی و شونینگدیک، وظیفهیی صلاحیتلریدن سوء استعمال قیلیب قندوز ولایتینینگ دشتآبدان منطقهسیدن نمره ترقهتیش نامی گه یوزلرچه کیشیدن 300 افغانیدن آلگن؛ نتیجهده هیچ بیر یشاوچی حاضرگچه نمره ایگهسی بولمهگن.
شونینگدیک، مذکور کیشی اوزینینگ 22 کیشینی نمایندهسی دیب پلخمری دینگیزینی سول تامانیدن 22 قطعه ییرنی اهالی گه (ایکی میلیون افغانی) ساتگن.
منطقه یشاوچیلری سیاهقل قیشلاغینینگ اوتلاقی و کلانگذر قیشلاغینی یوز ییللیک آریغی غصب ایتیلگنیدن ایسلب ایتیشیچه، قومندان غلامنظر تامانیدن غصب ایتیلگن ییرلر کینگلیگی 200 جریبدن آرتیق دیر، بیراق بغلان ولایتینینگ استیناف محکمهسی اهالینینگ حجتی و عریضهلرینی تیکشیرمسدن، بو قومنداننینگ نفعی گه حکم بیرگن.
اوشبو منطقهلرنی اهالیسی و یشاوچیلرنینگ ادعا قیلیشیچه، قومندان غلامنظر، ناقانونی قوراللی قومندان دیر و نیچه ییلدن بویان غصب قیلگن ییرلرنی اطرافینی دیوار قیلگن و اهالینینگ باردی و کیلدی یولینی هم توسگن.
بغلان ولایتینینگ مرکزی پلخمری دینگیزینی سول تامانی و دوشی تومنینینگ کلانگذر قیشلاغینی اهالیسیدن نمایندهلیک قیلگن محمداسحاق و بسمالله نینگ ایتیشیچه، :«غلامنظرنینگ ایتیشیچه، برچه نرسه اونگه تیگیشلی بولهدی.»
بیراق، قومندان غلامنظر اهالی ادعالرینی رد قیلیب ایتیشیچه، بو ییر آتهسیدن اونگه میراث قالگن و یوز ییلدن آرتیق دیر کیم، عایلهسی ملکیتی بولگن و شونینگدیک، محکمهنی حکمینی آلگن.
بغلان ولایتینینگ ییر بوتونلیک ریاستی باشلیغی رمضان راستین، ییر غاصبلرینینگ 2 مینگ دوسیهسی مملکت قضایی ادارهلریگه تاپشیریلگنیدن خبر بیرهدی؛ بیراق قومندان غلامنظرنینگ دوسیهسی توغریسیده ایتیشیچه، ییر بوتونلیک ادارهسی بو توغریده میدیاگه آرتیقچه معلومات بیریش گه رخصت بیرمهگن.
عین حالده، بغلان ولایتینینگ ییر بوتونلیک ادارهسیدن بیر منبع آتی فاش ایتیلمهسینی ایستهب سلاموطندارگه ایتیشیچه، بو دولتنینگ ییرلری دیر و کلانگذر اهالیسی ییللر دیر اوندن اوتلاق صفتیده فایدهلنهدی.
بغلان ولایتینینگ استیناف محکمهسی باشلیغی زارمحمد راسخ، دوسیهلر تیکشیریلمهگنی توغریسیده ایتیشیچه، بو دعوا حقوقی بیر قضیه دیر و تیکشیریش گه نیاز بار؛ شو یوزهدن تیکشیروو زمان آلهدی. جناب راسخ گه کوره، اهالینینگ قولیده قارهلاوچیلرنینگ رشوه آلگنی توغریسیده مدرک و حجت بولگن صورتده، بو اداره گه تاپشیریلسین.
ییر غصبی بحثیدن ایری، بو جنجللرنی باشقه بیر بولیمی افغانستانده مالکیت رویخطگه آلینیشی اوچون مدنیت یوقلیگی دیر. حکومتی ادارهلرده شخصی املاک و دولتنینگ ییرلریدن کوپینچهسی رسمی شکلده رویخطگه آلینمهگن.
