اوشبو واقعه اوتگن کیچه جوزجان ولایتی نینگ مرکزی شبرغان شهری نی «منگوتی» قیشلاغیده یوز بیرگن.
جوزجان پولیس قومندانلیگی سوزلاوچیسی احمدمسعود ندیم، اوشبو خبرنی تصدیقلب سلام‌وطندارگه ایتیشیچه، 18 یاشیده بولگن برات و 15 یاشیده بولگن نظیفه علاقه‌لری بولگنی باعث، ناتانیش قوراللی کیشی‌لر تامانیدن اولدیریلگن. اونگه کوره، مذکور قیز و اوغیل اویدن قاچیب چیققن بیرچاغده اولدیریلگن.
جوزجان پولیس قومندانلیگی سوزلاوچیسی نینگ کوپه‌یتیریشیچه، اوشبو واقعه عامل‌لری حاضرگچه قولگه آلینمه‌گن، بیراق بو کیشی‌لر تانیلیب و قولگه آلینیشی توغریسیده پولیس کوچلری تیرگاو باشله‌گن.
جوزجان ولایتیده انسان حقلری ایرکین کمیسیونی نینگ ساحه‌وی دفتری مسؤولی مغفرت صمیمی نینگ ایتیشیچه، اوشبو ولایتده اوتگن ییل گه نسبتن جاری ییل‌ده عیاللرگه قرشی زوروانلیک‌لر میزانی 10% آشگن.
اونگه کوره، اوتگن ییل جوزجانده عیاللرگه قرشی زوروانلیک رقمی 25% ایکن، بیراق جاری ییل‌ده بو رقم 35% گه آشگن.
خانم صمیمی گه کوره، جوزجان ولایتیده عیاللرگه قرشی زوروانلیک‌لرنینگ عاملی قتل، زورلب تورموش گه چیقاریش، خودکش‌لیک و جنسی زوروانلیک بولگن. اونینگ کوپه‌یتیریشیچه، مذکور ولایتده سونگی ناتینچلیک‌لر هم عیاللرگه قرشی زوروانلیک‌لر آشیشی گه سبب بولگن.
جوزجان ولایتیده عیاللر ریاستی تامانیدن بیریلگن رقم‌لر اساسیده، جاری ییل باشلنگنیدن بویان مذکور اداره ده 108 زوروانلیک واقعه رویخط‌گه آلینگن.
