جمهورلیک ریاستی ینگیدن بیر حکم صادر قیلدی. اونگه اساس، حکومت سوزلاوچیلری معلوماتنی توغری و وقتیده میدیالر بیلن شریک قیلیشلری کیرهک.
(یکشنبه) کون کابلده خبر بیر ییغین اوتکزگن جمهورلیک ریاستی سوزلاوچیسی هارون چخانسورینینگ ایتیشیچه، جمهور رییس تامانیدن ینگیدن صادر ایتیلگن 7 مادهلیک حکم اساسیده، حکومت، وزیرلر، والیلرنینگ سوزلاوچیلری و باشقه حکومتی رسمیلر، معلوماتنی توغری و وقتیده خبرچیلر بیلن شریک قیلهدیلر.
جمهور رییس سوزلاوچیسینینگ ایتیشیچه، حکومت سوزلاوچیلری نه فقط خبرچیلر بیلن سوزلشهدی، بلکیم میدیالر تامانیدن سورهلگن معلوماتنی اولرنینگ اختیاریده قویهدیلر.
جناب چخانسوریگه کوره، وزیرلر، مرکزی مسؤوللر و والیلر، چمهسی هر بیر آیده قیلگن ایشلرینی میدیا بیلن شریک قیلیب و معلومات بیریش خصوصیده، هر کون 15 دقیقه سوزلاوچیلری بیلن بحث اوتکزهدیلر.
چخانسورینینگ کوپهیتیریشیچه، جمهور رییسنینگ حکمی اساسیده، مرکز و ولایتلردهگی هر بیر دولتی اداره، تیزلیکده توغری معلومات بیریش اوچون اوچ تلیفون رقم و مسؤول ادارهلرنینگ آدرسینی میدیالرنینگ اختیاریده قویهدی.
اوشبو ییغینگه قتنشگن افغانستان میدیالریدن حمایت قیلووچی تشکیلات (نی) باشلیغی صدیقالله توحیدی، جمهور رییسنینگ ینگی حکمینی خوش قرشیلهدی، بیراق حکم عملگه آشیریلیشی اوستیگه تأکیدلهدی.
جناب توحیدینینگ ایتیشیچه، خبرچیلرگه بیریلهدیگن معلومات حکومت سوزلاوچیلری تامانیدن سانسور ایتیلمهسی کیرهک. جناب توحیدی، مملکتده خبرچیلرگه قرشی اویوشتیریلگن سونگی زورهوانلیکلر عاملی، دولتی ادارهلر تامانیدن معلومات بیریلمهگنی دیب بیلهدی.
جمهور رییس، ایکی ییل آلدین، آنت ایچیش مراسمینی اوتکزگنیدن کیین، معلوماتگه قول تاپیش قانونینینگ تصدیقلهدی، بیراق حاضرگچه دولتی ادارهلر، معلوماتنی توغری و وقتیده میدیالرنینگ اختیاریده قویمهیدی. جمهور رییسنینگ ینگی حکمی بو قیینچیلیکنی حل ایتهدی می یوق؟ بونگه زمان جواب بیرهدی.
