حکومت اجراییه ریاستینینگ فرهنگی مصلحتچیسی سید فاضل سانچارکی، بوتون قدرتنی جمهور رییسلیک سرایی اوز قمراویگه آلگنلیگینی معلوم قیلگن. اجراییه ریاستینینگ کوپینچه صلاحیتلری هم جمهور رییسنینگ یخشی حکومتچیلیک اوچون مخصوص نمایندهسیگه بیریلگن دیدی سانچارکی. غنی و عبدالله اورتهسیده قول قوییلگن سیاسی بیتیم اساسیده ملی و ییریک قرارلر بیر تامانلمه آلینمی بلکه ایکّی رهبرنینگ نظری آستیده عملی بولیشی بیلدیریلگن.
بوگون (سهشنبه) کابلده یولگه قوییلگن ییغینده نطق سوزلهگن سانچارکی، اجراییه ریاستی صلاحیتیگه کابینه ارهلهشیشی، اجراییه ادارهسی تامانیدن تکلیف ایتیلگن کادرلر جمهور رییسلیک سرایی تامانیدن کیین گه قالدیریلیشی، سیلاولرگه اصلاحات کیریتیش جریانی سُستلیگی، اساسی قانون اوزگرتیریلیشی اوچون کمیسیون ایجاد ایتیلمهگنلیگی، برقی کیملیکلر ترقهتیلیشی اوچون کوچلی اراده یوقلیگی، اجراییه ریاستی وزیرلرینینگ صلاحیتی چیکلهنیشی جمهور رییسلیک سرایی نینگ سیاسی بیتیم عملی ایتیلیشیگه قیزیقمسلیگینی کورسه تهدی دیگن.
ییغینده قتنشگن فعال سیاستچی و اسلامی جمعیت حزبینینگ رهبرلیک اعضاسی واقف حکیمی، ملی بیرلیک حکومتینینگ رهبرلری سیاسی بیتیمنی عملی قیلیشده ناکام ایکنلیکلرینی ایتگن. اونینگ سوزلریگه کوره، سیلاولر قانونیگه اصلاحات کیریتیش، تنلاو کمیتهسی ایجاد قیلیش و پارلمانی و ولسواللیک کینگش سیلاولری اوتکزیش، اساسی قانون اوچون کته ییغین اوتکزیشگه زمنیه یره تهدی؛ حال بوکه بو توغریده هیچ ایش بجریلمهگن.
جمهور رییسلیک سرایی سوزلاوچیسینینگ اورین باسری شاهحسین مرتضوینینگ سلاموطندارگه ایتیشیچه، ملی بیرلیک حکومتی رهبرلری اورتهسیده هیچ قندهی مفکورهوی قرمه قرشیلیک یوق و برچه مُقررلیکلر مصلحت اساسیده بجریلهدی.
ملی بیرلیک حکومتینینگ سیاسی حیاتیدن بیر ییریم ییل اوتیب بارماقده، لیکن حکومت رهبرلری قیلهجک ایشلرینینگ ییریک قسمی حکومتی ملازملرینی جایلشتیریش اوستیده صرفلنگن. جمهور رییسلیک سرایی و اجراییه ریاستی اورتهسیده گی موجود ضدیتلر ملی مدافعه وزیرلیگی و ملی خوفسیزلیک ادارهسی نینگ هنوز هم سرپرستلر آرقهلی رهبرلیک ایتیلیشیگه باعث بولگن.
سیاسی تحلیلچیلر، ملی بیرلیک حکومتینینگ توب تاشی باشدن ایگری قوییلگن دیب، بو احوال یخشی بولیشینی کوتمسلیک کیره ک دیگنلر.
