جمهور رییسلیک سرایی مطبوعات بولیمی نینگ سرپرستی، عالی تینچلیک کینگشی بودجهسی کیسیلگن لیگینی رد قیلدی. اخیرگی نیچه کون ایچیده ایریم ییتکرمهلر بعضی بیر منبعلرگه اساسلب تیارلهگن گزارشلریده، مالی امکانیت بولمهگن لیگی اوچون حکومت عالی تینچلیک کینگشی بودجهسینی کیسکن دیگن ایدیلر.
اما، جمهور رییسلیک سرایی مطبوعات بولیمی نینگ سرپرستی شاه حسین مرتضوی کابلده اوتکزیلگن خبری انجمنده، عالی تینچلیک کینگشی نینگ بودجهسی کیسیلمهگن دیگن. مالی امکانیتلر موجود شونینگ اوچون حکومت بو کینگشنی بیکار قلیش اوچون قرار قبول قیلمهگن دیدی مرتضوی.
او، تینچلیک مذاکرهسیگه عاید بحثلر اوشبو کینگش آرقهلی آلغه آلیب باریلهدی دیگن.
جناب مرتضویگه کوره، جمهور رییس غنی نینگ حکمی اساسیده، جمهور رییس غنی نینگ سیاسی مصلحتچیسی محمد اکرم خپلواک حاضرگی لوازمیده بولیشیگه قرهمهی، تینچلیک عالی کینگشی کاتبلیگی نینگ اجراییه رییسی صفتیده هم تعیین بولگن.
عالی تینچلیک کینگشی نینگ رهبرلیگی تکمیل بولماقده، بو جریان تکمیل بولیشی بیلن مذکور کینگشگه کوزگه کورینرلی ایجابی اوزگریش کیلهدی دیگن سوزلاووچی.
حکومت بیلن گلبدالدین حکمتیار اورتهسیده قول قوییلگن شرطنامه نینگ عملی بولگن لیگی حقیده اشاره رقیلگن جناب مرتضوی، شرطنامه اون بیش کونگه قدر کوچگه کیریتیلهدی دیدی. شرطنامه گه موافق اسلامی حزب نینگ بیر قنچه محبوسلری تورمهدن آزاد قیلینیشی ایتیلهدی.
جمهور رییس غنی نینگ چیت ایل سفری
اقتصادی و تجاری همکارلیکلر کینگیتیریلیشی نیتده افغانستان جمهور رییسی محمد اشرف غنی استرلیا، اندونیزیا و سنگاپور دولتلریگه سفر قیلدی.
جمهور رییسلیک سرایی مطبوعات بولیمی نینگ سرپرستی شاه حسین مرتضوی بوگون خبری بیر ییغینده، جمهور رییس غنی استرلیا، اندونیزیا و سنگاپور دولتلریگه قیلگن سفری آقیمیده بو مملکتلر بلند مرتبهلی رسمیلری بیلن اوچرهشیب ملاقات قیلهدی دیگن.
اقتصاد، تجارت، ترانیزیت، کانلرنی قازیب چیقاریش، ایکینچیلیکنی رواجلنتیریش، عالی تحصیلات ملکی خذمتلر و دولت ادارهلری قابلیتینی آشیریش کبی مسالهلر اوستیده بحث قیلیش جمهور رییس سفرینینگ اساسی مقصدلریدن بولگنی ایتیلهدی.
جناب مرتضوی، بو سفر افغانستان اقتصادی همده تجارتی اوچون اینگ یوتوقلی سفر بولیشی ممکن دیدی.
جمهور رییسلیک مطبوعات خذمتی نینگ سرپرستی، جمهور رییس غنی اوشبو سفر جریانیده یوقاریده ایسله تیلگن دولتلرنینگ تجارلری بیلن اوچرهشیب افغانستانده ایکینچیلیک و کانلرنی قازیب چیقاریش ساحهسیده سرمایه یاتقیزیشنی تکلیف قیلیشی کوتیلهدی دیگن.
جمهور رییس محمد اشرف غنی رسمی بیر تشریف بیلن استرلیا، اندونیزیا و سنگاپور دولتلریگه جونب کیتدی.
مذکور سفرده جمهور رییس غنینی مملکت اقتصاد وزیری عبدالستار مراد، کانلر و پترولیم وزیرلیگی نامزدی نرگس نهان، سوو و بر ق وزیرلیگی معاونی امانالله غالب، عامه علاقهلر بوییچه جمهور رییس غنی نینگ مصلحتچیسی شاه زمان میوندی و جمهور رییس نینگ مصلحتچیسی عبدالحمید هلمندیلر یولداشلیک قیلهدیلر.
