افغانستان جمهورلیک ریاست دفتری بیرخبرنامه ترقه‌تیب ایتیشیچه، مملکت جمهور رییسی بوگون پنج‌شنبه، بیر بلندمرتبه‌لی حکومتی هیأت بیلن بریکس و شانگهای تشکیلاتی عضوی بولگن مملکت لرنینگ 15- اولتیریشی‌ده اشتراک ایتیش اوچون ایکی کون‌لیک سفرده روسیه‌گه ییتیب باردی.
خبرنامه‌گه کوره، جمهور رییس غنی بو سفرده بریکس و شانگهای تشکیلاتی‌نینگ ایکی اولتیریشی‌ده سوزله‌شی یانیده، مذکور تشکیلات‌لر عضوی بولگن مملکت‌لر باشلیغ‌لری بیلن منطقه‌یی همکارلیک‌لر کینگه‌ییشی، اینیقسه اقتصاد، منطقه و افغانستان‌ده تینچ‌لیک تامین‌لنیشی و جدی تهدیدلرگه قرشی کوره‌شیش خصوصی‌ده اوچره‌شیب و صحبت اوتکزیشلری ممکن.
تشقی ایشلر وزیرلیگی سیاسی اورین باسری حکمت‌خلیل کرزی‌نینگ خبری ییغینده میدیاگه ایتیشیچه، جمهور رییس غنی‌نینگ روسیه‌گه قیلگن سفریدن مقصد، منطقه همکارلیک‌لری و علاقه‌سینی کوچلنتیریش و پاکستان بیلن بولگن تینچ‌لیک سوزلشوولری دیر.
جناب کرزی، پاکستان تامانیدن افغانستان حکومتی و طالب‌لر اورته‌سیده رسمی تینچ‌لیک سوزلشوولری کوتیب آلینگنی‌دن منت‌دارلیک بیلدیریب ایتیشیچه، بو برنامه اوچون کوپ زمان کیره‌ک و افغانستان‌نینگ پاکستان یاردمی‌گه احتیاجی بار.
نماینده‌لر کینگشی عضوی عبدالقیوم سجادی‌‌گه کوره، شانگهای اولتیریشی افغانستان اوچون یخشی فرصت دیر.
جناب سجادی‌نینگ ایتیشیچه، شانگهای تشکیلاتی عضوی بولگن مملکت‌لر افغانستان‌ده تروریست‌لرگه قرشی کوره‌شیش خصوصی‌ده یخشی رول اوینه‌یدی و بو اولتیریش ایکی تامان همکارلیک‌لر وسوزلشوولرگه زمینه یره‌ته‌دی.
سجادی‌نینگ کوپه‌یتیریشیچه: « منطقه مملکت‌لری، تروریستی تهدیدلر افغانستان چیگره‌لریده قالمه‌گنی توغری‌سیده دقت قیلگن، و بو تهدیلرگه قرشی اویغورلیکده کوره‌شیش لازم. شانگهای اولتیریشی منطقه مملکت‌لری و افغانستان اوچون منطقه‌یی اویغورلیک ایجاد ایتیش فرصتی دیر».
شونینگ‌دیک سیاسی ایش بیلرمانلردن بیری اکبر فولاد، جمهور رییس غنی‌نینگ بو سفرینی افغانستان اوچون ایجابی حرکت بیلیب ایتیشیچه، بو اولتیریش تروریسم‌گه قرشی کوره‌شیش خصوصی‌ده افغانستان اوچون کوپ مهم دیر.
جناب فولادگه کوره، افغانستان، شانگهای عضوی بولگن مملکت‌لر اوچون مهم سنله‌دی و بو مملکت‌لر اقتصاد اوستیریش و تروریسم‌گه قرشی کوره‌شیش اوچون افغانستان‌گه یاردم بیره‌دیلر.
شونینگ‌دیک اوشبو سیاسی ایش بیلرمان‌نینگ ایتیشیچه، افغانستان‌ده‌گی اوروش چین و روسیه مملکت‌لری اوچون جدی تهدید سنله‌دی و بو اولتیریش افغانستان اوچون یخشی فرصت بوله آله‌دی.
فولادنینگ کوپه‌یتیریشیچه، منطقه مملکت‌لری حاضر افغانستان‌ده داعش گروهی فعالیت‌لری توغری‌سیده خواطر‌ده و افغانستان‌ده‌گی اوروش اولرنینگ اوستیگه سلبی تاثیر قالدیریشی‌دن قورقه‌دی.
ایش بیلرمان‌لرگه کوره، شانگهای تشکیلاتی عضوی بولگن مملکت‌لر همکارلیک‌لری امنیت و اقتصاد بولیمی‌گه حاضرگی شرایط‌‌ده افغانستان اوچون مهم دیر و افغانستان دولتی ایسه بو توغریده جدی صورتده سعی و حرکت قیلیشی لازم.
شانگهای اولتیریشی، روسیه «اوفا» شهریده اوتکزیله‌دی و بونگه عضو بولگن مملکت‌لر امنیت و اقتصاد توغری‌سیده بحث اوتکزه‌دیلر.
روسیه میدیاسی تامانیدن ترقه‌تیلگن گزارشلرگه کوره، جمهور رییس غنی جمعه کون روسیه جمهور رییسی ولادیمیر پوتین بیلن کاسا بیرمینگ لایحه‌سی اوستیگه سوزله‌یدی.
تشقی ایشلر وزیری صلاح‌الدین ربانی، ملی امنیت مصلحت‌چیسی حنیف اتمر و جمهور رییس‌نینگ اورته آسیاده‌گی خاص نماینده‌سی شاکر کارگر بو سفرده جمهور رییس‌گه همراه‌لیک قیله‌دیلر.
شانگهای تشکیلاتی میلادی 2001- ییل منطقه‌ده مدنیت، اقتصاد و امنیتی همکارلیگی اوچون ایجاد ایتیلدی. چین، روسیه، قزاقستان، تاجیکستان، اوزبیکستان و قیرغیزستان مملکت‌لری بو تشکیلات اصلی اعضالری دیر و افغانستان، ایران، هند، پاکستان و مغولستان مملکت‌لری ایسه اوشبو تشکیلات‌نی ناظر اعضاسی دییله‌دی.
