مملکت جمهوررئیسی محمد اشرف غنی، تاجیکستان جمهوررئیسی امام‌علی رحمان بیلن تلیفون آرقه‌لی صحبت اوتکزگن.
جمهوررئیس‌لیک سرایی بیر خبرنامه ترقه‌تیب ایتیشیچه، ایکی مملکت جمهوررئیس‌لری ایکی تامان علاقه‌لری اینیقسه سوداگرلیک، ترانزیت، منطقوی همکارلیکلر کوچه‌لنتیریلیشی و آمو دینگیزی اطرافیده همکارلیکلر کوپه‌یشی حقیده سوزلشگن.
مذکور خبرنامه بوگون (دوشنبه ۳- سنبله) نشر ایتیلگن کیم اونگه جمهوررئیس غنی‌دن نقل قیلینیب یازیلیشیچه، «افغانستان و تاجیکستان چیگره‌سی دوستلیک و ترقیات نقطه‌سیگه اوزگره‌دی و بو ایکی قوشنی مملکت آره‌سیده همکارلیک و دوستلیک نمونه‌سی بولیشی ممکن.»
خبرنامه اساسیده، تاجیکستان جمهوررئیسی افغانستان حکومتی نینگ رهبرلیگی آستیده‌گی تینچلیک پروسه‌سیدن حمایت قیله‌دی و خلق‌ارا و منطقوی ییغین‌لرده مملکتی افغانستان نینگ یانیده توریشیدن سوزبیرگن.
خبرنامه نینگ کوپه‌یتیریشیچه، تاجیکستان جمهوررئیسی ایکی مملکت علاقه‌لری کینگه‌یشی اوچون جمهوررئیس غنی‌دن بو مملکتده سفر قیلیشی نی سوره‌گن.
مذکور تلیفونی علاقه ده ایکی تامان افغانستان تشقی ایشلر وزیرلیگی سرپرستی محمد حنیف اتمر نینگ ییتکچیلیگیده بیر هیات تاجیکستان ده سفر قیلیب و ایکی جمهوررئیس نینگ ییغینی نی آجنداسی توغریسیده ایش گه باشله‌شی حقیده کیلیشگن.
خبرنامه ده کیلیشیچه، افغانستان هیاتی تاجیکستان هیاتی بیلن ایکی مملکت آره‌سیده‌گی سیاسی موضوعلر، امنیتی و اقتصادی همکارلیکلر اینیقسه ترورچیلیک و مخدره ماده گه قرشی کوره‌شیش خصوصیده صحبت اوتکزیش‌لری ممکن.
جناب غنی تاجیکستان جمهوررئیسی بیلن تلیفون آرقه‌لی صحبت اوتکزگن بیرحالده، بیش کون آلدین تاجیکستان جمهوررئیسی آمو دینگیزی نینگ بو تامانده‌گی یشاوچی‌لری بیلن لودسپیکر آرقه‌لی صحبت اوتکزیب و اولرگه یاردم بیریش خصوصیده سوزبیردی. اجتماعی ترماقلر فعاللریدن قطاری بو ایش نی افغانستان نینگ ایچکی موضوع‌لریگه دخالت قیلیش دیگنلر.
ارگ نینگ خبرنامه‌سیده بو موضوع گه اشاره قیلینمه‌گن.
