په سپین غر کرېکټ لوبغالي کې له تېرو دوو ورځو راهیسې د رمضان کپ په نوم د کرېکټ سیالۍ روانې وې.
چارواکي وايي، لومړۍ چاودنه د لوبغالي دننه کومېنټري باکس سره او دوه نورې د لوبغالي په دروازه کې د عامو خلکو په منځ کې شوي دي چې له امله ۸ تنه ووژل شول او ۴۵ نور ټپیان شول.
د ننګرهار د والي ویاند عطاالله خوږیاڼي سلاموطندار ته وویل دا پېښه د ځای پر ځای شویو چاودېدونکیو توکیو له امله رامنځته شوې ده.
د پېښې عیني شاهدان وايي، د کرېکټ د تېرې شپې لوبې نندارې ته ناست وو چې ناڅاپه کومینټري باکس سره نږدې چاودنه وشوه او تقریبا دوه دقیقې وروسته په دروازو کې چاودنې وشوې.
په دې چاودنو کې د کرېکټ لوبغاړو ته زیان نه دی اوښتی.
دغهراز د لوبې پرمهال د افغانستان د کرېکټ ملي لوبډلې لوبغاړی کریم صادق هم شته و؛ خو ورور یې د نوموړي د روغتیا ډاډ ورکړی.
لومړني معلومات
د شنبې پر شپه شاوخوا ۱۱ بجې د ننګرهار ولایت په مرکز جلالاباد کې د سپین غر په کرېکټ لوبغالي کې د چاودنو له امله ۸کسان ووژل شول او ۴۳ تنه نور ټپیان شول.
دا درې پرلپسې چاودنې د جلالاباد ښار لومړۍ ناحیې اړوند بهسودو پله ته څېرمه د سپین غر په کرېکټ لوبغالي کې داسې مهال شوي چې هلته د رمضان کپ په نوم د کرېکټ سیالۍ روانې وې.
د ننګرهار د والي ویاند عطاالله خوږیاڼي د پېښې په تایید وویل، په وژل شویو کسانو کې د سیالیو برابروونکی هدایتالله زهیر او د لغمان ولایت د ښاروالۍ مرستیال ډاکټر نیکمل هم شامل دي.
د ننګرهار د عامې روغتیا رییس ډاکټر نجیبالله کاموال ویلي، د پېښې له ځایه جلالاباد حوزوي او یو بل خصوصي روغتون ته ۸ جسدونه او ۴۳ ټپیان وروړل شوي چې د ۷ ټپیانو روغتیایي حالت په کې نازک دی.
طالبانو رسنیو ته په یوې لېږلې خبرپاڼه کې ویلي، په پېښه کې دوی لاس نهلري.
تر اوسه کومې وسلهوالې ډلې د دې چاودنو مسوولیت نه دی اخستی.
چارواکیو تراوسه د چاودنو نوعیت په اړه څه نه دي ویلي.
چارواکي وایي، ښایي د پېښې په اوښتې مرګژوبلې شمېر کې بدولون راشي.
