ننگرهار ولایتی‌نینگ رسمی‌لری، جلال آباد شهری اوچینچی ناحیه‌سی‌ده پارتلش هجوم یوزبیرگنی‌دن خبر بیرگن. اوشبو هجوم بوگون ایرته‌لب ساعت 9 اطرافیده، پاکستان قنسولی یقینی‌ده یوزبیرگن.
ننگرهار حاکمی سوزلاوچیسی عطاء‌الله خوگیانی‌نینگ ایتیشیچه، خودکش هجومچی پولیس رنجری‌نی هدف قرار بیرگن و پارتلش هجوم یوزبیرگنی‌دن کیین، پولیس بیلن باشقه هجومچی‌لر اورته‌سیده توقنه‌شوو باشلنگن.
شونینگ‌دیک، عینی گواه‌لرنینگ ایتیشیچه، خودکش هجومچی بیرینچی‌دن پولیس تامان اوق آتگن و اوندن کیین، اوزینی پارتله‌تگن.
جناب خوگیانی‌نینگ ایتیشیچه، بو هجوم نتیجه‌سیده ایکی تینچ اهالی هلاک بولگن و باشقه ایکی کیشی یره‌لنگن.
بیراق، آتی فاش ایتیلیشی‌نی ایستمه‌گن بیر امنیتی منبع‌نینگ ایتیشیچه، بوگونکی یوزبیرگن پارتلش هجوم نتیجه‌سیده 6 کیشی هلاک بولگن وباشقه ایکی کیشی تن جراحت آلگن. اونگه کوره، مذکور واقعه‌ده هلاک بولگن‌لر و یره‌لنگن‌لر ایچیده امنیتی عسکرلرهم کورینه‌دی.
شونینگ‌دیک، اوشبو منبع‌گه کوره، واقعه‌ده هلاک بولگن‌لر ایچیده بیر باله هم بار دییله‌دی.
واقعه محلی‌دن سلام‌وطندار خبرچیسی‌نینگ ایتیشیچه، پاکستان قنسولی اطرافیده‌گی اوی‌لرده یاشینگن ایکی هجومچی امنیتی کوچلر بیلن توقنشماقده.
مذکور واقعه، ننگرهار بیلیم یورتی اورگه‌تیش و تربیه‌لش فاکولته‌سی بیلن بیر مکتب یقینی‌ده یوزبیرگن.
حاضرگچه هیچ بیر گروه، اوشبو واقعه مسؤولیتی‌نی اوز بوینیگه آلمه‌گن.
