د امریکا د بهرنیو چارو وزیر جان کري وايي، چې که يې د افغانستان په ولسمشریزو ټاکنو کې منځګړتوب نه وای کړای او دغه کړکېچ يې نه وای حل کړای، نو په دغه هېواد کې د کورني جنګونو د یو وار بیا تکرار احتمالات بیخي زیات شوي و.
نوموړي، چې د وروستي ځل لهپاره په امریکا کې د یوې خبري ناستې په ترڅ کې ښکاره شو زیاته يې کړه، چې د افغانستان ولسمشریزو ټاکنو کې د دوو مخکښو نوماندانو د جوړجاړي په موخه مداخله دغه هېواد يې له کړکېچه ژغورلی او پر وینا يې، ده ته د امریکا د بهرنيو چارو وزیر په توګه دا یوه لویه لاسته راوړنه وه.
په پام کې ده، چې په راتلونکو څو ورځو کې د امریکا نوی ولسمشر ډونالډ ټرمپ په رسمي ډول د متحده ایالاتو جمهور رییس په توګه په کار پېل او ولسمشر اوباما ورته په سولهییز ډول واک ولېږدوي.
نو له همدې امله د ولسمشر اوباما په ګډون د ده د ټيم ځينې لوړ پوړي چارواکي د وروستي ځل لهپاره د یو سیاسي رسم په توګه خپلې ویناوې کوي.
جانکري په داسې حال کې د افغانستان ولسمشریزو ټاکنو د کړکېچ حل د خپلو لاسته راوړنو په کتار کې شمېري، چې اوس هم د ملي وحدت حکومت مشرانو (افغان ولسمشر ډاکټر محمد اشرف غني او د حکومت اجرایوي مشر ډاکټر عبدالله عبدالله) ترمنځ د واک پر سر ناندرې پای ته نهدي رسېدلي.
کله چې د افغانستان ۹۳ کال ولسمشریزې دویم پړاو ټاکنې پای ته ورسېدې، نو د نتیجې اعلانولو وروسته د دوو مخکښو نوماندانو ترمنځ سخت جنجال رامنځ ته شو.
د همپالنې د ټيم مشر ډاکټر عبدالله عبدالله ادعا وکړه، چې په ټاکنو کې له ده سره درغلي شوې او باید دی ولسمشر شوي وای، خو د تحول او تداوم ټیم مشر ډاکټر اشرف غني بیا د پاکو او درغلیو رایو په بېلولو ټينګار کاوه.
د ټاکنو خپلواک کمېسیون د رايو شمېرنو لهمخې اوسنی ولسمشر اشرف غني له خپل سیال شاوخوا دوه میلیونه رایې مخکې و.
د دوی ترمنځ داخلي خبرې اترې نتیجه ور نهکړه او لانجمنه او لویه مسئله څو میاشتې افغانستان د سخت کړکېچ سره مخ کړی و.
وروسته له هغه د متحده ایالاتو د بهرنیو چارو وزیر جانکري منځګړیتوب وکړ او دواړو ترمنځ یو هوکړهلیک لاسلیک شو، چې په نتیجه کې يې د "ملي وحدت حکومت" رامنځ ته شو.
له دې هر څه سره ـ سره یو شمېر سیاسي شنونکي او عام وګړي پر دغو مشرانو سختې نيوکې کوي او وايي، چې دوی یوازې د واک تږي دي او د ملت غم ورته زیات اهمیت نهلري.
