جاری قویاش ییلده هیچ‌بیر چیت‌ایللیک سیاحتچی بدخشان ولایتی‌گه سفر قیلمه‌گن و بوتوغریده فعالیت قیله‌دیگن کوپ قطار آدم‌لر ایش‌لرینی قولدن بیرگن.
اوتگن ییل بدخشان ولایتی بوییچه معلومات و مدنیت ریاستی مسووللری نینگ اعلان قیلیشیچه، 1398- ییل بدخشانده سفر قیلگن چیت‌ایللیک سیاحتچی‌لرنینگ سانی باشقه ییل‌لرگه قره‌گنده کوپ ایگن، بیراق جاری ییلده کرونا ویروسی سبب، هیچ‌بیر چیت‌ایللیک سیاحتچی اوشبو ولایت‌گه سفر قیلمه‌گن.
بدخشان ولایتی بوییچه معلومات و مدنیت ریاستی نینگ سیاحت بولیمی آمری صدیقی لعل‌زاده نینگ ایتیشیچه، 1398- ییل بدخشانده سیاحت اوچون یخشی بیر ییل ایدی. اونینگ ایتیشیچه، مذکور ییلده 472 چیت‌ایللیک سیاحتچی اوشبو ولایت‌گه سفر قیلگن.
جناب لعل‌زاده نینگ کوپه‌یتیریشیچه، اوتگن ییل کمیده 45 مینگ سیاحتچی ملی پارک و سیاحتی ساحه‌‌لردن کوریب چیقگن‌لر.
اونینگ تاکید قیلیشیچه، چیت‌ایللیک سیاحتچی‌لرگه معلومات بیریش، ترجمان‌لیک، هوتل‌دارلیک و ترانسپورتی خذمت‌لر ارایه قیلیش بولیم‌لرده فعالیت قیله‌دیگن اونلرچه کیشی ایش‌لرینی قولدن بیرگن و بیرقطار سیاحتی شرکت‌لرنینگ ایش جوازلری توخته‌تیلگن.
بدخشان ولایتی بوییچه معلومات و مدنیت ریاستی، 152 ساحه‌نی سیاحتچی‌لر اوچون جاذبه‌لی محل عنوانیده قید قیلگن.
بدخشان محلی مسووللری نینگ ایتیشیچه، اوشبو ولایتده سیاحت بولیم‌ده دقت بولمه‌گن و سیاحتچی‌لر زمانه‌وی بولمه‌گن هوتل‌لرده حیات کیچیره‌دیلر.
بدخشان ولایتی نینگ اشکاشم تومنیده سیاحتچی‌لرگه خاص بیر مهمانخانه مسوولی عبدالصمد نینگ ایتیشیچه، کرونا ویروسی چیقگنیدن سونگ، هیچ‌بیر سیاحتچی اونینگ مهمانخانه‌سیگه کیلمه‌گن.
بدخشان ولایتی بوییچه معلومات و مدنیت ریاستی مسوول‌لریگه کوره، دولت و دولتی بولمه‌گن نهادلرنینگ سیاحتی بولیم‌لرده فعالیت قیله‌دیگنلرگه مالی یاردم بیریشی کیره‌ک.
ایکینچی ملی پارک بدخشان ولایتیده جایلشگن و اوشبو ولایت سیاحتچی‌لر اوچون جاذبه‌لی ولایت‌لردن بیری دیر، بیراق سونگی ییل‌لرده ناتینچلیک کوپه‌یگنی سبب، اوشبو ولایتده چیت‌ایللیک سیاحتچی‌لرنینگ حضوری کمه‌یگن.
