.jpg)
بو جمله هابیل یاسینی‌نینگ سونگ سوزی بولدی. هابیل پارتلش، آتیشمه و قان و قان توکیش‌دن اوزی‌نینگ قوتقره آلمه‌گن. بیلینگ بو ناله اوروش میدانیدن چیقمه‌گن و عین حالده، هابیل قان توکیش و عصیانچیلیک قیلیش اوچون قورال کوترمه‌گن.
عمومی توشونیش‌گه قره‌گنده هابیل قوراللی ایدی، لیکن قورالی بیلن کیم‌سه نینگ جانی گه قصد قیلیش اوچون اولگورمه‌گن؛ آچیقراق ایتگنده او لیسانس و یوکسک لیسانس دوره‌لریده اورگنگن نرسه‌لریدن قوراللی بولگن ایدی و بو قورال بیلن جهالت گه سون بیریش اوچون آدیم کوتردی. لیسانس دوره‌سینی هرات ولایتی‌نینگ مهندسلیک فاکولته‌سیدن آلیب و اونچه زمان اوتمه‌ی یوکسک لیسانس‌نی دوام بیریش امتیازینی قولگه کیریتگن ایکن. او هم باشقه یوزلرچه یاش کبی ایش ایزلب کابل کیلگن ایکن.
.jpg)
بیراق، او بو ایگه‌سیز شهرده قنده‌ی بیر نرسه‌گه دوچ کیلیشی‌نی بیلمس ایدی. شونینگدیک، آچ قارین بیلن یشش، معناسیز اولیم‌دن افضل‌لیگی‌نی بیله آلمه‌گن ایدی. نیمه اوچون اوله‌دی، قیسی بیر ارزش و قنده‌ی بیر جنایت اوستیدن؟
او، حاضر بیزلرنینگ آره‌میزده یوق دیر، اونینگ اورنی‌نی کیم تولدیره‌دی؟ سونگی کونلر فواید عامه وزیرلیگی‌ده پروژه‌لر مهندسی صفتیده ایش گه کیریشی اوچون قرار قویگن ایدی. مذکور وزیرلیک‌نینگ اوستیگه هجوم اویوشتیریلیشی گه بویروغ بیرگن‌لر و یا-ده واقعه یوز بیرگن چاغیده، قوراللرینی قوییب قاچگن‌لر قنده‌ی قیلیب بونده‌ی بیر ییگیت نینگ اورنی‌نی تولدیره‌دی؟ انسان سرمایه‌لری ضایع ایتیلیشی گه کیم جواب بیره‌دی؟
.jpg)
بو صورت گه قره‌نگ. قانلی بیر واقعه‌دن سونگ اطرافیده بولگن جیم‌لیک. هابیل شهادت برماغی‌نی کیم‌لرگه تامان اوزتگن؟ هابیل‌نینگ اولدیرگن انسانلر بو صورت‌نی کورگنده تیتره‌مه‌یدیلرمی؟ بو برماغ اولرنینگ کورگنیدن دلالت بیره‌دی؛ قاتل‌لرینی اوز کوزی بیلن کورگن؛ اولر ایسه وحشت و بربریت‌لرینی گناه‌سیز و تینچ اهالی گه کورستگن‌لر و شونینگدیک، اولر غیرت و وجدانلرینی آیاق آستی قیلیب و قورقینچلیک بیلن مدافعه‌سیز کیشی‌لرنی اوز حال‌لریگه قوییب و قاچیب کیتگن‌لر.
مدافعه‌سیز انسانلرنی اولدیرگن‌لر و مدافعه‌سیزلرنی قوییب قاچگن‌لر بیلن جایی‌ده قالیب نتیجه‌ده اولگن هابیل‌نینگ حکایه‌سی شاملونینگ بیر قطعه شعری بیلن بیلگی‌لنه‌دی:
مردی ز بادِ حادثه بنشست
مردی چو برقِ حادثه برخاست
آن، ننگ را گُزید و سپر ساخت
وین، نام را، بدونِ سپر خواست.
